لیہ: جشن آزادی سپورٹس گالا کے تحت سپورٹس کمپلیکس لیہ میں انڈر 13 بچوں کے درمیان دوستانہ فٹ بال میچ کھیلا گیا۔ میچ کے مہمان خصوصی ڈپٹی کمشنر لیہ آصف علی ڈوگر تھے۔
اس موقع پر ایڈیشنل ڈپٹی کمشنر میونسپل سروسز شبیر احمد ڈوگر، ڈسٹرکٹ سپورٹس آفیسر امتیاز احمد بھٹی، جنرل سیکرٹری ڈسٹرکٹ پریس کلب لیہ رانا خالد شوق اور دیگر موجود تھے۔
ڈپٹی کمشنر آصف علی ڈوگر نے فٹ بال میچ میں بچوں کی بھرپور حوصلہ افزائی کی اور کھیلوں میں ان کی دلچسپی کو سراہتے ہوئے انہیں شاباش دی۔ انہوں نے کہا کہ جشن آزادی کی خوشیوں کو کھیلوں کی سرگرمیوں کے ساتھ منانا نوجوان نسل میں حب الوطنی، صحت مند مسابقت اور مثبت سرگرمیوں کے فروغ کا بہترین ذریعہ ہے۔
انہوں نے کہا کہ وزیراعلیٰ پنجاب مریم نواز شریف کی ہدایات کے مطابق نوجوانوں کو کھیلوں کے بہتر مواقع فراہم کیے جا رہے ہیں تاکہ وہ اپنی صلاحیتوں کو اجاگر کرتے ہوئے ملک و قوم کا نام روشن کر سکیں۔
ڈپٹی کمشنر نے کہا کہ کھیل جسمانی صحت کے ساتھ ساتھ نظم و ضبط، ٹیم ورک، برداشت اور خود اعتمادی کو فروغ دیتے ہیں۔ جشن آزادی کے موقع پر کھیلوں کی ایسی سرگرمیوں کا انعقاد نوجوانوں میں قومی جذبے کو مزید اجاگر کرنے کے ساتھ ساتھ انہیں صحت مند اور مثبت سرگرمیوں کی جانب راغب کرنے میں معاون ثابت ہوگا۔
