لیہ، 13 اگست 2026: یومِ آزادی بھرپور، شایان شان اور قومی جوش و جذبے کے ساتھ منانے کے لیے ضلعی انتظامیہ نے تمام انتظامات مکمل کر لیے۔ ضلعی انتظامیہ کے زیر اہتمام یومِ آزادی کی مرکزی تقریب 14 اگست کو ڈی پی ایس بوائز ونگ میں منعقد ہوگی۔
اس سلسلہ میں ڈپٹی کمشنر آصف علی ڈوگر کی زیر صدارت انتظامات کا جائزہ لینے کے لیے کمیٹی روم میں اجلاس منعقد ہوا۔ اجلاس میں ایڈیشنل ڈپٹی کمشنر میونسپل سروسز شبیر احمد ڈوگر، چیف ایگزیکٹو آفیسر ہیلتھ ڈاکٹر شاہد ریاض، چیف ایگزیکٹو آفیسر تعلیم ڈاکٹر محمد قیوم، ڈپٹی ڈائریکٹر کالجز ذوالفقار علی حیدری، ایس ڈی ای او پیرا ام حبیبہ، ڈپٹی ڈائریکٹر انفارمیشن نثار احمد خان، ڈی او سپورٹس امتیاز احمد بھٹی، ڈسٹرکٹ ایمرجنسی آفیسر ڈاکٹر سجاد احمد، اسسٹنٹ چیف وائلڈ لائف رینجرز سدرۃ المنتہیٰ، پرنسپل ڈی پی ایس سکولز طاہرہ ذوالفقار، عثمان رشید، ڈی ای او گل شیر، ایم ڈی واسا عارف عباس اور متعلقہ محکموں کے افسران نے شرکت کی، جبکہ اسسٹنٹ کمشنرز اصغر علی اور ذوالفقار صابر نے ویڈیو لنک کے ذریعے اجلاس میں شرکت کی۔
اجلاس میں بتایا گیا کہ مرکزی تقریب کا آغاز صبح 7 بج کر 58 منٹ پر سائرن بجا کر کیا جائے گا، جس کے بعد صبح 8 بجے پرچم کشائی اور سلامی پیش کی جائے گی۔ پولیس، پیرا اور وائلڈ لائف کے دستے مارچ پاسٹ کریں گے جبکہ واسا اور ستھرا پنجاب کی ٹیمیں بھی پریڈ میں شریک ہوں گی۔
تقریب میں سکول طلبہ کی جانب سے ملی نغمے، تقاریر، خاکے اور ٹیبلوز پیش کیے جائیں گے جبکہ بورڈ پوزیشن ہولڈرز میں شیلڈز بھی تقسیم کی جائیں گی۔ اس موقع پر ثقافتی جھومر، گھوڑا ڈانس اور اونٹ ڈانس بھی پیش کیا جائے گا۔ تقریب کے اختتام پر ڈی پی ایس سکول سے کشمیر چوک تک آزادی واک بھی کی جائے گی۔
جشن آزادی کے موقع پر صبح 11 بجے عنایت فاریسٹ رینج گولہ اڈا کے مقام پر میگا شجرکاری بھی کی جائے گی۔ علاوہ ازیں 14 اگست کی شب سپورٹس کمپلیکس میں فیملی میوزیکل نائٹ اور شاندار آتش بازی کا مظاہرہ بھی کیا جائے گا۔
اجلاس سے خطاب کرتے ہوئے ڈپٹی کمشنر آصف علی ڈوگر نے کہا کہ آزادی بہت بڑی نعمت ہے اور زندہ قومیں یوم آزادی شایان شان انداز میں مناتی ہیں۔ انہوں نے ہدایت کی کہ جشن آزادی کی مرکزی تقریب کو مثالی بنانے کے لیے تمام محکمے اپنی ذمہ داریاں بھرپور انداز میں ادا کریں اور انتظامات میں کسی قسم کی کمی نہ رہنے دی جائے۔
