ماسکو: روس میں گزشتہ چار سال سے قید سابق امریکی فوجی رابرٹ گلمین کو انسانی بنیادوں پر رہا کر دیا گیا، رہائی کے بعد وہ امریکا پہنچ گیا۔
امریکی میڈیا کے مطابق روسی صدر ولادیمیر پیوٹن نے رابرٹ گلمین کی سزا معاف کرنے پر رضامندی ظاہر کی، جبکہ صحت کی خرابی کے باعث انہیں انسانی بنیادوں پر رہائی دی گئی۔
امریکی صدر ڈونلڈ ٹرمپ نے سابق امریکی فوجی کی رہائی کا خیرمقدم کرتے ہوئے کہا ہے کہ روسی صدر ولادیمیر پیوٹن سے گفتگو کے بعد انسانی بنیادوں پر رابرٹ گلمین کی رہائی ممکن ہوئی۔
ٹرمپ کے مطابق روس نے رابرٹ گلمین کی رہائی کے بدلے کسی روسی قیدی کی رہائی کا مطالبہ نہیں کیا۔
رابرٹ گلمین کو روسی پولیس افسر پر تشدد کے الزام میں 2022ء میں ماسکو سے گرفتار کیا گیا تھا اور وہ گزشتہ چار سال سے روس میں قید تھا۔
