لیہ: ڈپٹی کمشنر لیہ آصف علی ڈوگر کی زیر صدارت یومِ آزادی 14 اگست کی تقریبات کے انتظامات کے حوالے سے اجلاس منعقد ہوا، جس میں جشنِ آزادی کی تقریبات کو شایانِ شان انداز میں منعقد کرنے کے لیے انتظامات کا تفصیلی جائزہ لیا گیا۔
اجلاس میں ایڈیشنل ڈپٹی کمشنرز ڈاکٹر عابدہ فرید، شبیر احمد ڈوگر، سی ای او تعلیم ڈاکٹر عبدالقیوم، ڈپٹی ڈائریکٹر کالجز ذوالفقار حیدری، ڈی ایس او امتیاز احمد بھٹی سمیت متعلقہ افسران نے شرکت کی۔
اجلاس میں فیصلہ کیا گیا کہ 14 اگست کو ڈی پی ایس بوائز ونگ لیہ میں مرکزی تقریب منعقد ہوگی، جہاں پرچم کشائی کے بعد شاندار مارچ پاسٹ کیا جائے گا۔ مارچ پاسٹ میں ضلعی پولیس، ریسکیو 1122، کاؤنٹر نارکوٹکس فورس، پیرا، سول ڈیفنس، محکمہ جنگلات، محکمہ تعلیم کے سکاؤٹس، ستھرا پنجاب اور واسا کے دستے شرکت کریں گے۔
جشنِ آزادی کے سلسلے میں اینیمل اینڈ پیٹ شو، ثقافتی شو جھومر اور مختلف کھیلوں کے مقابلے بھی منعقد کیے جائیں گے، جبکہ قومی سطح کے کھلاڑیوں کو بھی تقریبات میں مدعو کیا جائے گا۔13 اگست کی رات 12 بجے کشمیر چوک پر شاندار آتش بازی کا مظاہرہ کیا جائے گا۔
مرکزی تقریب کے لیے ڈی پی ایس بوائز ونگ میں مسٹ فینز اور ایس ایم ڈی اسکرینز بھی نصب کی جائیں گی۔ یومِ آزادی کے موقع پر ڈسٹرکٹ جیل، دارالامان کے مکینوں اور ڈی ایچ کیو ہسپتال لیہ میں زیرِ علاج مریضوں میں مٹھائی بھی تقسیم کی جائے گی۔
مرکزی تقریب کے اختتام پرڈی پی ایس بوائز ونگ سے کشمیر چوک تک آزادی واک کا انعقاد کیا جائے گا، جس میں عوامی نمائندگان، سرکاری افسران، ملازمین اور شہری بھرپور شرکت کریں گے۔
اجلاس میں یومِ آزادی کی تقریبات کے دوران جامع سکیورٹی، ٹریفک مینجمنٹ، اوقاتِ کار، ڈیوٹی روسٹر اور دیگر انتظامات کو حتمی شکل دینے کے لیے متعلقہ محکموں کو ضروری ہدایات جاری کی گئیں۔
ڈپٹی کمشنر آصف علی ڈوگر نے کہا کہ14 اگست ہماری قومی تاریخ کا اہم دن اور آزادی کی نعمت کو یاد کرنے کا موقع ہے تمام متعلقہ محکمے تقریبات کے انتظامات بروقت مکمل کریں اور باہمی رابطے کے ذریعے جشنِ آزادی کی تقریبات کو شایانِ شان انداز میں منعقد کیا جائے۔
انہوں نے کہا کہ جشنِ آزادی قومی جوش و جذبے، ولولے اور حب الوطنی کے ساتھ منایا جائے گا اور معاشرے کے تمام طبقات کو قومی خوشیوں میں بھرپور انداز میں شریک کیا جائے گا۔
