لیہ: ضلع لیہ کی معروف سیاسی و سماجی شخصیت اور اپوزیشن کی سیاست کے دیرینہ رہنما چوہدری اصغر علی گجر ایڈووکیٹ رضائے الٰہی سے انتقال کر گئے۔ ان کے انتقال کی خبر سے سیاسی، سماجی اور وکلا حلقوں میں گہرے رنج و غم کی لہر دوڑ گئی۔
چوہدری اصغر علی گجر ایڈووکیٹ کا شمار لیہ میں 1980ء کی دہائی میں اپوزیشن سیاست کے اولین رہنماؤں میں ہوتا تھا۔ انہوں نے ضلع لیہ سمیت ضلع سے باہر بھی اپنی سیاسی جدوجہد، مؤثر اندازِ گفتگو اور عوامی رابطے کے ذریعے سیاست میں نمایاں کردار ادا کیا۔
مرحوم جماعت اسلامی کے پنجاب اسمبلی میں پارلیمانی لیڈر بھی رہے اور اپنی سیاسی جدوجہد کے دوران حزبِ اقتدار کے لیے ایک مضبوط اور مؤثر اپوزیشن آواز سمجھے جاتے رہے۔ ان کی سیاسی زندگی کا ایک نمایاں پہلو عوامی مسائل کو اجاگر کرنا اور سیاسی کارکنوں سے مسلسل رابطے میں رہنا تھا۔
سیاسی حلقوں کے مطابق چوہدری اصغر علی گجر ایڈووکیٹ ایک بااصول، بے باک اور مضبوط سیاسی شخصیت کے مالک تھے۔ ان کے انتقال سے لیہ میں اپوزیشن مزاج کی سیاست اور سیاسی کارکنوں کے حلقوں میں ایک بڑا خلا پیدا ہوگیا ہے، جسے طویل عرصے تک محسوس کیا جائے گا۔
مرحوم کے اہل خانہ کے مطابق چوہدری اصغر علی گجر ایڈووکیٹ کی نمازِ جنازہ آج شام 6 بجے چک نمبر 156 ٹی ڈی اے میں ادا کی جائے گی۔
اللہ تعالیٰ مرحوم کی مغفرت فرمائے، انہیں جنت الفردوس میں اعلیٰ مقام عطا فرمائے اور لواحقین و پسماندگان کو صبرِ جمیل عطا فرمائے۔ آمین۔
