لیہ: ڈی ایس پی پٹرولنگ ضلع لیہ راؤ عمر فاروق نے وزیراعلیٰ پنجاب مریم نواز شریف کے ویژن ’’سیف پنجاب‘‘ کے تحت ضلع کی مختلف پٹرولنگ پوسٹس کا دورہ کیا اور افسران و ملازمان کو عوامی خدمت، روڈ سیفٹی اور جدید سیکیورٹی اقدامات کے حوالے سے خصوصی ہدایات جاری کیں۔
ڈی ایس پی راؤ عمر فاروق نے پٹرولنگ پوسٹس اور لدھانہ موڑ، دھوری اڈہ کا دورہ کرتے ہوئے پوسٹس کے ریکارڈ، ڈیوٹی امور، گشت کے نظام اور مجموعی کارکردگی کا تفصیلی جائزہ لیا۔
اس موقع پر انہوں نے تمام انچارج پٹرولنگ پوسٹس کو ہدایت کی کہ ضلع بھر کی پبلک ٹرانسپورٹ گاڑیوں کی ہر سیٹ کے پیچھے کیو آر پینک بٹن کا کوڈ لازماً چسپاں کروایا جائے تاکہ کسی بھی ہنگامی صورتحال، ڈرائیور کی خطرناک ڈرائیونگ، اوور اسپیڈنگ، اوورچارجنگ یا دیگر شکایات کی صورت میں مسافر فوری طور پر متعلقہ اداروں کو اطلاع دے سکیں اور بروقت کارروائی ممکن بنائی جا سکے۔
راؤ عمر فاروق نے افسران و اہلکاروں کو ہدایت کی کہ روڈ یوزرز کے ساتھ خوش اخلاقی اور احترام سے پیش آئیں، عوامی خدمت کو اولین ترجیح بنائیں اور شہریوں کو بہترین پولیسنگ کی سہولیات فراہم کریں۔
انہوں نے روڈ سیفٹی اور ٹریفک آگاہی مہم کو مزید مؤثر بنانے کی ہدایت کرتے ہوئے کہا کہ شہریوں کو ٹریفک قوانین کی پابندی، محفوظ ڈرائیونگ اور احتیاطی تدابیر کے حوالے سے مسلسل آگاہی فراہم کی جائے۔
ڈی ایس پی پٹرولنگ نے اوورلوڈ ٹرکوں اور ٹریکٹر ٹرالیوں کے خلاف بلاامتیاز کارروائی کا حکم دیتے ہوئے کہا کہ شاہرات پر ہونے والے متعدد حادثات کی بنیادی وجوہات میں اوورلوڈنگ بھی شامل ہے، جس کے خاتمے کے لیے سخت اور مؤثر اقدامات ناگزیر ہیں۔
انہوں نے محکمہ میں کرپشن کے حوالے سے زیرو ٹالرنس پالیسی کا اعادہ کرتے ہوئے واضح کیا کہ کرپشن میں ملوث کسی بھی ملازم کے ساتھ کوئی رعایت نہیں برتی جائے گی اور اس کے خلاف سخت محکمانہ کارروائی عمل میں لائی جائے گی۔
راؤ عمر فاروق نے ڈیجیٹل ای پولیس ایپ کے مؤثر استعمال کو یقینی بنانے کی بھی ہدایت کی اور کہا کہ جدید ٹیکنالوجی سے بھرپور استفادہ کرتے ہوئے جرائم پر قابو پانے اور شہریوں کو فوری سہولیات کی فراہمی کے اقدامات مزید مؤثر بنائے جائیں۔
