لیہ: ڈائریکٹر جنرل تعلقات عامہ پنجاب کے احکامات پر ڈائریکٹر تعلقات عامہ ڈی جی خان ڈویژن محمد شہزاد نے ڈسٹرکٹ انفارمیشن آفس لیہ کا دورہ کیا، جہاں ڈپٹی ڈائریکٹر انفارمیشن نثار احمد خان نے ان کا استقبال کیا۔
دورے کے دوران ڈائریکٹر تعلقات عامہ نے دفتر کے مختلف شعبوں کا معائنہ کرتے ہوئے عملے کی حاضری، دفتری نظم و ضبط، صفائی ستھرائی اور مجموعی انتظامی امور کا تفصیلی جائزہ لیا۔
اس موقع پر محمد شہزاد نے کہا کہ جدید دور کے تقاضوں کے مطابق محکمہ تعلقات عامہ کی ذمہ داریاں پہلے سے کہیں زیادہ اہم ہو چکی ہیں۔ حکومت پنجاب اور عوام کے درمیان مؤثر رابطہ قائم کرتے ہوئے حکومتی پالیسیوں، ترقیاتی منصوبوں اور عوامی فلاح و بہبود کے اقدامات کو بروقت، مستند اور ذمہ دارانہ انداز میں عوام تک پہنچانا محکمہ کی بنیادی ذمہ داری ہے۔
انہوں نے کہا کہ وزیراعلیٰ پنجاب مریم نواز شریف کی قیادت میں حکومت پنجاب عوامی خدمت، گڈ گورننس اور شفاف طرز حکمرانی کے فروغ کے لیے مؤثر اقدامات کر رہی ہے، جن کی مثبت اور بھرپور تشہیر وقت کی اہم ضرورت ہے۔
ڈائریکٹر تعلقات عامہ نے ہدایت کی کہ پرنٹ، الیکٹرانک، سوشل اور ڈیجیٹل میڈیا سمیت تمام ذرائع ابلاغ کو مؤثر انداز میں استعمال کرتے ہوئے حکومتی منصوبوں، ترقیاتی سرگرمیوں اور عوامی فلاحی اقدامات کی جامع اور بروقت کوریج یقینی بنائی جائے تاکہ شہری حکومت پنجاب کی عوام دوست پالیسیوں سے بروقت آگاہ رہ سکیں۔
انہوں نے مزید کہا کہ جدید ذرائع ابلاغ سے ہم آہنگی، پیشہ ورانہ مہارت اور ذمہ دارانہ انداز میں معلومات کی ترسیل محکمہ تعلقات عامہ کی پیشہ ورانہ ذمہ داری ہے۔
بعد ازاں ڈپٹی ڈائریکٹر انفارمیشن لیہ نثار احمد خان نے ڈائریکٹر تعلقات عامہ کو دفتر کے انتظامی و محکمانہ امور، جاری سرگرمیوں اور میڈیا کوریج سے متعلق تفصیلی بریفنگ بھی دی۔
