لیہ: ڈپٹی کمشنر لیہ آصف علی ڈوگر کی زیر صدارت امن کمیٹی کا اجلاس منعقد ہوا، جس میں ضلع بھر میں امن و امان کی صورتحال، بین المسالک ہم آہنگی اور چہلم حضرت امام حسینؓ کے موقع پر کیے جانے والے انتظامات کا تفصیلی جائزہ لیا گیا۔
اجلاس میں ڈسٹرکٹ پولیس آفیسر حسن جاوید بھٹی، ایڈیشنل ڈپٹی کمشنر جنرل شبیر احمد ڈوگر، امن کمیٹی کے اراکین، متعلقہ محکموں کے افسران اور دیگر حکام نے شرکت کی۔
ڈپٹی کمشنر آصف علی ڈوگر نے اجلاس سے خطاب کرتے ہوئے کہا کہ امن، بھائی چارہ، رواداری اور باہمی احترام ہم سب کی مشترکہ ذمہ داری ہے۔ ضلع لیہ ہمیشہ مذہبی ہم آہنگی اور امن و امان کے حوالے سے مثالی روایات کا حامل رہا ہے، جنہیں برقرار رکھنا ہم سب کا فرض ہے۔
انہوں نے علماء کرام، ذاکرین، امن کمیٹی کے ممبران اور شہریوں پر زور دیا کہ وہ معاشرے میں محبت، اخوت اور اتحاد کے فروغ کیلئے اپنا مثبت کردار ادا کریں۔
ڈپٹی کمشنر نے کہا کہ چہلم حضرت امام حسینؓ کے پرامن انعقاد کیلئے تمام انتظامات مکمل کیے جا رہے ہیں۔ جلوس روٹس پر صفائی، روشنی، پینے کے صاف پانی، سیکیورٹی، ٹریفک مینجمنٹ اور طبی سہولیات سمیت تمام ضروری اقدامات یقینی بنائے جائیں گے۔
ڈی پی او حسن جاوید بھٹی نے بتایا کہ چہلم کے موقع پر امن و امان کے قیام کیلئے جامع سیکیورٹی پلان ترتیب دیا گیا ہے۔ جلوسوں اور مجالس کی نگرانی، حساس مقامات پر اضافی نفری کی تعیناتی اور جدید مانیٹرنگ سسٹم کے ذریعے مسلسل نگرانی کی جائے گی۔
انہوں نے کہا کہ قانون نافذ کرنے والے ادارے کسی بھی صورتحال سے نمٹنے کیلئے مکمل طور پر الرٹ ہیں، جبکہ امن و امان میں خلل ڈالنے والے عناصر کے خلاف بلاامتیاز کارروائی عمل میں لائی جائے گی۔
اجلاس کے اختتام پر امن کمیٹی کے اراکین نے ضلعی انتظامیہ اور پولیس کے ساتھ مکمل تعاون کی یقین دہانی کراتے ہوئے ضلع میں امن، بھائی چارے اور مذہبی ہم آہنگی کے فروغ کیلئے اپنا کردار ادا کرنے کے عزم کا اظہار کیا۔
