جدید لیہ جمخانہ کی ممبرشپ کا آغاز، ابتدائی 100 ممبران کے لیے خصوصی رعایت کا اعلان

لیہ(نمائندہ لیہ ٹی وی)وزیراعلیٰ پنجاب مریم نواز شریف کے وژن کے تحت ضلع لیہ میں شہریوں کو جدید تفریحی، سماجی اور کھیلوں کی معیاری سہولیات کی فراہمی کے لیے پرانے سول کلب کی جگہ زیرِ تعمیر جدید لیہ جمخانہ کی ممبرشپ کا باقاعدہ آغاز کر دیا گیا۔ اس سلسلہ میں لیہ جمخانہ میں ممبرشپ لانچنگ تقریب منعقد ہوئی جس میں ڈپٹی کمشنر لیہ آصف علی ڈوگر اور ڈسٹرکٹ پولیس آفیسر لیہ حسن جاوید بھٹی نے بطور مہمانانِ خصوصی شرکت کی۔ تقریب میں ایڈیشنل ڈپٹی کمشنر جنرل شبیر احمد ڈوگر، ایڈیشنل ڈپٹی کمشنر ریونیو ڈاکٹر عابدہ فرید، اسسٹنٹ کمشنرز، مختلف محکموں کے افسران، کاروباری و سماجی شخصیات، کلب ممبران اور شہریوں کی بڑی تعداد نے شرکت کی۔ تقریب کے دوران شہریوں نے لیہ جمخانہ کی ممبرشپ کے حصول میں بھرپور دلچسپی کا اظہار کیا۔ ابتدائی 100 ممبران کے لیے خصوصی رعایت کے تحت ممبرشپ فیس 2 لاکھ روپے مقرر کی گئی ہے جبکہ ابتدائی 100 ممبران کے بعد ممبرشپ حاصل کرنے والوں کے لیے فیس 3 لاکھ روپے ہوگی۔ اس موقع پر ڈپٹی کمشنر لیہ آصف علی ڈوگر نے کہا کہ لیہ جمخانہ کی ممبرشپ کا باقاعدہ آغاز کر دیا گیا ہے جبکہ منصوبے کا تعمیراتی کام تیزی سے جاری ہے اور اسے آئندہ چھ ماہ کے اندر مکمل کر لیا جائے گا۔ انہوں نے کہا کہ لیہ جمخانہ میں کھیلوں اور تفریحی سرگرمیوں کو یکجا کرتے ہوئے شہریوں کے لیے جدید اور معیاری سہولیات شامل کی گئی ہیں جن میں سوئمنگ پول، بیڈمنٹن کورٹ، ٹیبل ٹینس، دیگر ان ڈور گیمز، جدید جم، کیفے ٹیریا، اوپن روف کیفے ٹیریا، گیسٹ رومز اور واکنگ ٹریک شامل ہیں۔ ڈپٹی کمشنر نے کہا کہ لیہ جمخانہ میں شہریوں اور خاندانوں کی بنیادی تفریحی، سماجی اور کھیلوں کی ضروریات کو مدِنظر رکھتے ہوئے تمام ضروری سہولیات فراہم کی جا رہی ہیں۔ منصوبے کو جدید تقاضوں اور اعلیٰ معیار کے مطابق مکمل کرنے کے لیے تمام دستیاب وسائل بروئے کار لائے جا رہے ہیں۔ انہوں نے کہا کہ ممبرشپ کے آغاز پر شہریوں کی جانب سے بھرپور اور حوصلہ افزا ردِعمل سامنے آیا ہے ڈاکٹرز، پروفیسرز، تاجر برادری، کاروباری و سماجی شخصیات اور معاشرے کے دیگر تمام طبقات لیہ جمخانہ کی ممبرشپ حاصل کریں اور اس کے بانی ممبران کا حصہ بنیں۔ ڈپٹی کمشنر لیہ آصف علی ڈوگر نے کہا کہ لیہ جمخانہ محض کھیلوں اور تفریح کی سہولت نہیں بلکہ شہریوں، مختلف شعبہ ہائے زندگی سے تعلق رکھنے والے افراد اور سرکاری افسران کے درمیان باہمی روابط، مثبت میل جول اور سماجی سرگرمیوں کے فروغ کا ایک مؤثر پلیٹ فارم ثابت ہوگ مختلف طبقات اور حکومتی نمائندوں کے باہمی رابطے سے شہری مسائل کو بہتر انداز میں اجاگر کرنے اور ان کے قابل عمل حل تلاش کرنے میں بھی مدد ملے گی۔ انہوں نے کہا کہ مستقبل میں لیہ جمخانہ کی سہولیات اور دائرۂ کار کو مزید وسعت دی جائے گی اور منصوبے کی تکمیل کے بعد ضلع کے شہری اس جدید سہولت سے بھرپور استفادہ کر سکیں گے۔ڈسٹرکٹ پولیس آفیسر لیہ حسن جاوید بھٹی نے لیہ جمخانہ کے قیام کو ضلع کے لیے ایک مثبت اور خوش آئند اضافہ قرار دیتے ہوئے کہا کہ کھیلوں، صحت مند تفریح اور مثبت سماجی سرگرمیوں کا فروغ نوجوان نسل کی کردار سازی اور صلاحیتوں کو نکھارنے میں اہم کردار ادا کرتا ہے۔ تقریب کے شرکاء نے پرانے سول کلب کی جگہ جدید لیہ جمخانہ کے قیام اور ممبرشپ کے آغاز کو سراہتے ہوئے امید ظاہر کی کہ یہ منصوبہ ضلع لیہ میں جدید شہری سہولیات، صحت مند تفریح، کھیلوں اور مثبت سماجی سرگرمیوں کے فروغ میں ایک اہم سنگِ میل ثابت ہوگا۔