لیہ (نمائندہ لیہ ٹی وی)ڈسٹرکٹ پبلک سکولز لیہ کی تاریخ میں پہلی مرتبہ اساتذہ کی تدریسی صلاحیتوں میں بہتری کے لیے جامع تربیتی ورکشاپ اور اسیسمنٹ کا عمل کامیابی سے مکمل کر لیا گیا۔ڈپٹی کمشنر آصف علی ڈوگر کی زیر صدارت منعقدہ اجلاس میں بتایا گیا کہ ضلع بھر کے ڈی پی ایس کے 6 کیمپسز کے 143 اساتذہ کی تربیت اور اسیسمنٹ مکمل کی گئی، جس میں مضمون پر گرفت، سبق کی منصوبہ بندی، تدریسی مہارتوں اور طلبہ کی تعلیمی کارکردگی بہتر بنانے پر خصوصی توجہ دی گئی۔اجلاس سے خطاب کرتے ہوئے ڈپٹی کمشنر نے کہا کہ معیاری تعلیم کے فروغ کے لیے اساتذہ کی مسلسل تربیت اور اسیسمنٹ ناگزیر ہے۔ انہوں نے کہا کہ ڈی پی ایس کی تاریخ میں پہلی بار اساتذہ کی باقاعدہ تربیت کا انعقاد ایک اہم سنگ میل ہے اور مستقبل میں بھی یہ عمل مستقل بنیادوں پر جاری رکھا جائے گا۔ انہوں نے اسیسمنٹ کمیٹی کی کارکردگی کو سراہتے ہوئے کہا کہ بورڈ آف گورنرز کے آئندہ اجلاس میں سفارشات کی روشنی میں تعلیمی نظام کو مزید مؤثر بنایا جائے گا۔
