نواں کوٹ میں ایل پی جی سلنڈر شاپس کی انسپکشن، سرکاری نرخوں اور حفاظتی انتظامات کا جائزہ زائد نرخ وصولی، ذخیرہ اندوزی اور غیر معیاری سلنڈرز کی فروخت برداشت نہیں کی جائے گی، انفورسمنٹ آفیسر شوکت حیات

لیہ( نمائندہ لیہ ٹی وی) اسسٹنٹ کمشنر چوبارہ ذوالفقار صابر کی ہدایت پر انفورسمنٹ آفیسر پیرا فورس شوکت حیات نے موضع نواں کوٹ میں گھریلو گیس سلنڈر شاپس کی انسپکشن کی۔ معائنے کے دوران سرکاری نرخ ناموں، ایل پی جی سلنڈرز کی مقررہ نرخوں پر فروخت، حفاظتی انتظامات اور حکومتی ہدایات پر عملدرآمد کا جائزہ لیا گیا۔ دکانداروں کو ہدایت کی گئی کہ نرخ نامے نمایاں جگہ پر آویزاں رکھیں، مقررہ نرخوں پر فروخت یقینی بنائیں اور آگ بجھانے کے آلات سمیت تمام حفاظتی اقدامات مکمل رکھیں۔ انفورسمنٹ آفیسر پیرا فورس شوکت حیات نے کہا کہ ذخیرہ اندوزی، زائد نرخ وصولی، غیر معیاری سلنڈرز کی فروخت اور حفاظتی ضوابط کی خلاف ورزی کسی صورت برداشت نہیں کی جائے گی اور خلاف ورزی کرنے والوں کے خلاف بلاامتیاز قانونی کارروائی عمل میں لائی جائے گی جبکہ انسپکشنز کا سلسلہ آئندہ بھی جاری رہے گا۔