لیہ( نمائندہ لیہ ٹی وی)وزیراعلیٰ پنجاب مریم نواز شریف کے احکامات پر خواتین اور خاندانوں کو معیاری اور محفوظ تفریحی سہولیات کی فراہمی کے لیے ضلع لیہ میں ترقیاتی منصوبوں پر تیزی سے کام جاری ہے۔ ڈپٹی کمشنر لیہ آصف علی ڈوگر کی ہدایت پر فتح پور میں لیڈیز پارک کی تعمیر تکمیل کے آخری مراحل میں داخل ہو چکی ہے۔ پارک میں واکنگ ٹریک، بچوں کے لیے پلے ایریا، گزیبوز، مسجد اور جدید کیفے ٹیریا سمیت مختلف سہولیات فراہم کی جا رہی ہیں تاکہ خواتین اور خاندانوں کو بہترین اور پُرسکون تفریحی ماحول میسر آ سکے۔ ڈپٹی کمشنر آصف علی ڈوگر نے متعلقہ افسران کو ہدایت کی ہے کہ منصوبے کو اعلیٰ معیار کے مطابق جلد مکمل کیا جائے تاکہ شہری بالخصوص خواتین اور بچے اس جدید تفریحی سہولت سے مستفید ہو سکیں۔ انہوں نے کہا کہ حکومت پنجاب کے ویژن کے مطابق عوام کو معیاری شہری سہولیات کی فراہمی ضلعی انتظامیہ کی اولین ترجیح ہے۔
