کراکاس: وینزویلا میں حالیہ تباہ کن زلزلوں نے جہاں ہزاروں خاندانوں کو متاثر کیا ہے، وہیں ارجنٹائن کے فٹبالر لوکاس تریخو بھی اس سانحے سے شدید متاثر ہوئے ہیں۔ بین الاقوامی میڈیا رپورٹس کے مطابق زلزلے کے نتیجے میں ان کی اہلیہ یانینا مارانیلا اور دو بچے آرون تریخو اور آئینہوا تریخو جاں بحق ہوگئے ہیں۔
کلب انتظامیہ کی جانب سے جاری بیان میں افسوس ناک خبر کی تصدیق کرتے ہوئے لوکاس تریخو اور ان کے اہلِ خانہ سے دلی تعزیت اور ہمدردی کا اظہار کیا گیا ہے۔ بیان میں کہا گیا ہے کہ اس مشکل گھڑی میں کلب اور شائقین فٹبال ان کے ساتھ کھڑے ہیں۔
رپورٹس کے مطابق زلزلے کے وقت لوکاس تریخو کی اہلیہ اور بچے ساحلی علاقے پلایا گراندے میں موجود تھے، جہاں ان کی رہائشی عمارت شدید زلزلے کے باعث منہدم ہوگئی۔ حادثے کے بعد تینوں افراد لاپتہ قرار دیے گئے تھے تاہم امدادی کارروائیوں کے دوران ان کی لاشیں ملبے سے نکال لی گئیں۔
دوسری جانب زلزلے کے وقت لوکاس تریخو اپنی ٹیم کے ہمراہ دارالحکومت کراکاس میں آئندہ میچ کی تیاریوں میں مصروف تھے۔ اہلِ خانہ کے لاپتہ ہونے کے بعد انہوں نے سوشل میڈیا کے ذریعے عوام سے دعا اور مدد کی اپیل بھی کی تھی۔
بین الاقوامی میڈیا اور اقوامِ متحدہ کی رپورٹس کے مطابق 24 جون کو آنے والے شدید زلزلوں سے لاکھوں افراد متاثر ہوئے ہیں۔ مختلف علاقوں میں عمارتوں کے منہدم ہونے، بنیادی ڈھانچے کو نقصان پہنچنے اور امدادی سرگرمیوں میں مشکلات کے باعث ہلاکتوں اور زخمیوں کی تعداد میں مسلسل اضافہ ہو رہا ہے۔
قدرتی آفت کے اس المناک واقعے پر دنیا بھر سے فٹبال شخصیات، کلبوں اور مداحوں نے لوکاس تریخو کے ساتھ اظہارِ یکجہتی کرتے ہوئے مرحومین کے لیے دعائے مغفرت اور لواحقین کے لیے صبر جمیل کی دعا کی ہے۔
