لَیَّہ (نمائندہ لیہ ٹی وی) عوام کو ایک ہی چھت تلے جدید اور آسان سرکاری خدمات کی فراہمی کے لیے لَیَّہ میں ای خدمت سینٹر کے قیام کی تیاریاں تیز کر دی گئی ہیں۔ اس سلسلے میں کچہری روڈ پر مجوزہ ای خدمت سینٹر کے لیے اراضی کا انتخاب مکمل کر لیا گیا ہے۔ڈپٹی کمشنر آصف علی ڈوگر نے مجوزہ سائٹ کا دورہ کرتے ہوئے اراضی کا تفصیلی جائزہ لیا۔ اس موقع پر انہوں نے کہا کہ وزیر اعلیٰ پنجاب مریم نواز شریف کے وژن کے مطابق شہریوں کو مختلف سرکاری خدمات ایک ہی مقام پر فراہم کی جائیں گی جس سے وقت اور اخراجات کی بچت ممکن ہو سکے گی۔انہوں نے بتایا کہ ای خدمت سینٹر میں ڈومیسائل، برتھ سرٹیفکیٹ، ڈیتھ سرٹیفکیٹ، میرج و طلاق رجسٹریشن، فرد ملکیت، لینڈ ریکارڈ، ای اسٹامپنگ، اسلحہ لائسنس، موٹر وہیکل ٹوکن ٹیکس اور دیگر متعدد سرکاری خدمات دستیاب ہوں گی۔ ڈپٹی کمشنر نے متعلقہ افسران کو منصوبے کی بروقت تکمیل یقینی بنانے کی ہدایت بھی کی۔
