لیہ(نمائندہ لیہ ٹی وی ) وزیراعلیٰ پنجاب کے وژن کے تحت لیہ میں ترقیاتی منصوبے جاری، تیسرا سپورٹس ارینا تکمیل کے قریب۔ وزیراعلیٰ پنجاب مریم نواز شریف کے وژن کے مطابق ضلع لیہ میں عوامی فلاح و بہبود اور شہری سہولیات کی فراہمی کے لیے ترقیاتی منصوبوں پر تیزی سے کام جاری ہے۔ اسی سلسلے میں شہر کا تیسرا جدید سپورٹس ارینا تکمیل کے آخری مراحل میں داخل ہو گیا ہے، جو نوجوانوں کو کھیلوں اور صحت مند سرگرمیوں کے مزید مواقع فراہم کرے گا۔ ڈپٹی کمشنر آصف علی ڈوگر نے منظور پارک کا دورہ کیا اور زیر تعمیر سپورٹس ارینا، پلے گراؤنڈ، کیفے ٹیریا اور دیگر ترقیاتی کاموں کا تفصیلی معائنہ کیا۔ انہوں نے منصوبے پر جاری تعمیراتی سرگرمیوں کی رفتار اور معیار کا جائزہ لیا اور متعلقہ افسران کو کام بروقت اور اعلیٰ معیار کے مطابق مکمل کرنے کی ہدایت کی۔ ڈپٹی کمشنر نے کہا کہ کھیلوں کے فروغ اور نوجوانوں کو مثبت سرگرمیوں کی جانب راغب کرنے کے لیے جدید سہولیات کی فراہمی ضلعی انتظامیہ کی ترجیحات میں شامل ہے۔ انہوں نے زور دیا کہ تمام تعمیراتی مراحل میں معیار پر کوئی سمجھوتہ نہ کیا جائے تاکہ شہریوں کو بہترین تفریحی اور کھیلوں کی سہولیات میسر آ سکیں۔ دریں اثناء ڈپٹی کمشنر نے جنرل بس سٹینڈ کا دورہ کیا اور اپ گریڈیشن کے کام کا جائزہ لیا۔ ڈپٹی کمشنر نے ہدایت کی کہ جنرل بس سٹینڈ کے کام کو جلد مکمل کیا جائے تاکہ ٹرانسپورٹرز اور مسافروں کو بہترین سہولیات میسر آئیں۔ انہوں نے کہا کہ جنرل بس سٹینڈ کسی بھی شہر کی مجموعی صورتحال کے غماز ہوتے ہیں اور لیہ کے جنرل بس سٹینڈ کو شہر کے وقار کے مطابق صاف ستھرا اور خوبصورت بنایا جائے گا۔
