لیہ(نمائندہ لیہ ٹی وی )محرم الحرام کے سلسلہ میں ضلع لیہ میں امن و امان کے لیے فول پروف انتظامات، ضلعی امن کمیٹی کا اہم اجلاس کمیٹی روم میں منعقد ہوا۔ ڈپٹی کمشنر آصف علی ڈوگر کی زیر صدارت ضلعی امن کمیٹی کا اجلاس منعقد ہوا جس میں ڈسٹرکٹ پولیس آفیسر حسن جاوید، ایڈیشنل ڈپٹی کمشنر جنرل شبیر احمد ڈوگر، اسسٹنٹ کمشنرز، متعلقہ افسران اور امن کمیٹی کے ممبران نے شرکت کی۔ اجلاس میں محرم الحرام کے دوران امن و امان، سیکیورٹی اور سہولیات کے انتظامات کا تفصیلی جائزہ لیا گیا۔ ڈپٹی کمشنر آصف علی ڈوگر نے کہا کہ محرم الحرام کے دوران ضلع لیہ کے مثالی امن کو ہر صورت برقرار رکھا جائے گا۔ تمام مجالس اور جلوسوں کے لیے فول پروف سیکیورٹی انتظامات کیے جائیں گے جبکہ میونسپل سروسز کی بلا تعطل فراہمی یقینی بنائی جائے گی۔ انہوں نے متعلقہ محکموں کو ہدایت کی کہ جلوسوں اور مجالس کے راستوں پر صفائی ستھرائی، پانی کے چھڑکاؤ، اسٹریٹ لائٹس کی فعالی، بجلی کی جھولتی تاروں کی درستی اور دیگر ضروری سہولیات کو محرم الحرام سے قبل مکمل کیا جائے۔ جلوس روٹس کی تعمیر و مرمت کا کام بھی محرم الحرام سے قبل مکمل کرنے کی ہدایت کی گئی۔ اجلاس سے خطاب کرتے ہوئے ڈپٹی کمشنر نے علماء کرام اور امن کمیٹی کے ممبران پر زور دیا کہ وہ امن، بھائی چارے، مذہبی رواداری اور باہمی احترام کے فروغ میں اپنا مؤثر کردار ادا کریں اور انتظامیہ کے ساتھ مکمل تعاون کریں۔ انہوں نے کہا کہ تمام معاملات باہمی رابطے اور ہم آہنگی کے ذریعے حل کیے جائیں گے اور ضلع میں فرقہ واریت یا نفرت انگیزی کی کوئی گنجائش نہیں۔ اجلاس میں اس امر کا بھی اعادہ کیا گیا کہ سوشل میڈیا پر نامناسب، اشتعال انگیز اور مذہبی منافرت پر مبنی مواد کے خلاف قانون کے مطابق کارروائی عمل میں لائی جائے گی۔ ڈسٹرکٹ پولیس آفیسر حسن جاوید نے اجلاس سے خطاب کرتے ہوئے کہا کہ محرم الحرام کے دوران سیکورٹی کے جامع اور مؤثر انتظامات کئے جائیں گے اور امن دشمن عناصر پر کڑی نظر رکھی جائے گی تاکہ پُرامن ماحول برقرار رکھا جا سکے۔ اجلاس کے اختتام پر ملک کی سلامتی، ترقی، استحکام اور بین المسالک ہم آہنگی کے لیے خصوصی دعا بھی کی گئی۔ اجلاس میں علمدار حسین شاہ، قاری فدا الرحمن، عبدالمنان، چیئر مین انجمن تاجران تنویر خان، طارق محمود پہاڑ، عبدالروف، طلحہ زبیر، سید نیر عباس، منور احمد نظامی، محسن رضا عظمی، علی رضا، عمار علی سامٹیہ، محمود عثمانی اور اظہر حسین زیدی نے شرکت کی۔
