لیہ (نمائندہ لیہ ٹی وی) پولیس لائن لیہ میں ہفتہ وار جنرل پریڈ کا انعقاد کیا گیا۔ پریڈ میں ایلیٹ فورس، ٹریفک پولیس اور ضلعی پولیس کے دستوں نے بھرپور انداز میں شرکت کرتے ہوئے شاندار مارچ پاسٹ کا مظاہرہ کیا اور سلامی پیش کی۔ڈی ایس پی آرگنائزڈ کرائم محمد حیات نے جنرل پریڈ کا معائنہ کیا اور سلامی لی۔ اس موقع پر انہوں نے جوانوں کے ٹرن آؤٹ، نظم و ضبط اور پیشہ ورانہ تیاری کا تفصیلی جائزہ لیا۔ ڈی ایس پی نے بہترین ٹرن آؤٹ اور اعلیٰ کارکردگی کا مظاہرہ کرنے والے پولیس اہلکاروں کو شاباش دیتے ہوئے ان کی حوصلہ افزائی کی۔بعد ازاں ڈی ایس پی محمد حیات نے ایم ٹی ہال کا دورہ کیا جہاں پولیس گاڑیوں کی حالت اور دستیابی کا معائنہ کیا گیا۔ انہوں نے میس ہال میں کھانے کے معیار اور صفائی ستھرائی کے انتظامات کا بھی جائزہ لیا اور متعلقہ افسران کو معیار برقرار رکھنے کی ہدایات جاری کیں۔اس موقع پر ڈی ایس پی محمد حیات کا کہنا تھا کہ پولیس فورس میں نظم و ضبط، جسمانی فٹنس اور پیشہ ورانہ صلاحیتوں کو مزید بہتر بنانے کے لیے جنرل پریڈ کا باقاعدگی سے انعقاد کیا جا رہا ہے تاکہ عوام کو مؤثر اور بہترین پولیسنگ کی سہولیات فراہم کی جا سکیں۔
