ڈی پی او لَیّہ اور ڈی پی او بھکر کا مشترکہ بارڈر وزٹ، دہشت گردی و سمگلنگ روکنے کیلئے مشترکہ لائحہ عمل تیار لَیّہ اور بھکر پولیس کا جرائم کے خاتمے اور شہریوں کے تحفظ کیلئے مل کر اقدامات جاری رکھنے کے عزم کا اظہار

لَیّہ (نمائندہ لَیّہ ٹی وی) ڈی پی او لَیّہ حسن جاوید بھٹی اور ڈی پی او بھکر شہزاد رفیق اعوان نے گزشتہ شام لَیّہ اور بھکر کی مشترکہ ضلعی سرحد کا مشترکہ دورہ کیا، جہاں دونوں اضلاع کی پولیس کے اعلیٰ افسران کے درمیان اہم اجلاس بھی منعقد ہوا۔اجلاس کے دوران دہشت گردی کی روک تھام، جرائم کے سدباب، بین الاضلاعی جرائم پیشہ عناصر کی نقل و حرکت کی نگرانی اور گندم کی غیر قانونی سمگلنگ کی روک تھام سے متعلق مختلف امور پر تفصیلی تبادلہ خیال کیا گیا۔ دونوں اضلاع کو محفوظ بنانے اور امن و امان کی صورتحال مزید بہتر بنانے کیلئے مشترکہ حکمت عملی اور لائحہ عمل بھی تیار کیا گیا۔اس موقع پر متعلقہ ڈی ایس پیز، ایس ایچ اوز اور دیگر پولیس افسران بھی موجود تھے۔ پولیس حکام نے سرحدی علاقوں میں چیکنگ کے نظام کو مزید مؤثر بنانے، مشترکہ ناکہ بندیوں اور انٹیلی جنس شیئرنگ کو بہتر بنانے پر بھی اتفاق کیا۔ڈی پی او لَیّہ حسن جاوید بھٹی نے کہا کہ جرائم پیشہ عناصر اور سمگلرز کے خلاف بلا امتیاز کارروائیاں جاری رکھی جائیں گی جبکہ شہریوں کے جان و مال کے تحفظ کیلئے تمام دستیاب وسائل بروئے کار لائے جا رہے ہیں۔ڈی پی او بھکر شہزاد رفیق اعوان نے اس موقع پر کہا کہ بین الاضلاعی تعاون کے ذریعے دہشت گردی، منشیات، سمگلنگ اور دیگر جرائم پر قابو پانے میں مدد ملے گی اور دونوں اضلاع کی پولیس عوام کے تحفظ کیلئے مشترکہ اقدامات جاری رکھے گی۔دونوں اضلاع کے پولیس سربراہان نے اس عزم کا اظہار کیا کہ عوام کے جان و مال کے تحفظ، امن و امان کے قیام اور جرائم کے خاتمے کیلئے آئندہ بھی باہمی تعاون اور رابطے کو مزید مضبوط بنایا جائے گا۔