عیدالاضحیٰ پر امن و امان کیلئے لَیّہ بھر میں سنیپ چیکنگ، مشکوک افراد اور گاڑیوں کی سخت نگرانی
ڈی پی او لَیّہ حسن جاوید بھٹی کی ہدایت پر پولیس کی مختلف شاہراہوں، چوکوں اور داخلی راستوں پر ناکہ بندیاں، بائیو میٹرک تصدیق بھی کی گئی
لَیّہ (نمائندہ لَیّہ ٹی وی) ڈی پی او لَیّہ حسن جاوید بھٹی کی ہدایت پر عیدالاضحیٰ کے موقع پر ضلع بھر میں امن و امان کی صورتحال کو یقینی بنانے اور کسی بھی ناخوشگوار واقعے سے بچنے کیلئے سکیورٹی کے سخت انتظامات کرتے ہوئے سنیپ چیکنگ کا سلسلہ جاری رکھا گیا۔اس سلسلے میں ضلع کے تمام تھانہ جات سے پولیس ٹیموں نے متعلقہ ڈی ایس پیز کی سربراہی میں لَیّہ کی مرکزی شاہراہوں، چوکوں، چوراہوں اور اہم داخلی و خارجی راستوں پر ناکہ بندیاں کیں۔ پولیس اہلکاروں نے دورانِ چیکنگ مشکوک گاڑیوں، موٹر سائیکلوں اور افراد کی تلاشی لی جبکہ شہریوں کے شناختی کارڈز چیک کرنے کے ساتھ ساتھ بائیو میٹرک تصدیق کا عمل بھی انجام دیا گیا۔پولیس ذرائع کے مطابق سنیپ چیکنگ کے دوران مشتبہ سرگرمیوں پر کڑی نظر رکھی گئی تاکہ کسی بھی جرائم پیشہ یا دہشت گرد عنصر کی نقل و حرکت کو بروقت روکا جا سکے۔ مختلف مقامات پر پولیس کی بھاری نفری تعینات رہی جبکہ حساس علاقوں میں اضافی سکیورٹی انتظامات بھی کیے گئے۔اس موقع پر گفتگو کرتے ہوئے ڈی پی او لَیّہ حسن جاوید بھٹی نے کہا کہ سنیپ چیکنگ کا بنیادی مقصد دہشت گرد عناصر، جرائم پیشہ افراد اور ان کے سہولت کاروں کی نقل و حرکت پر کڑی نظر رکھنا اور انہیں قانون کی گرفت میں لانا ہے۔ انہوں نے کہا کہ عیدالاضحیٰ کے تہوار کو مکمل طور پر پرامن بنانے کیلئے لَیّہ پولیس ہر ممکن اقدامات کر رہی ہے۔ڈی پی او لَیّہ نے شہریوں سے اپیل کی کہ وہ پولیس کے ساتھ تعاون کریں، دورانِ چیکنگ صبر و تحمل کا مظاہرہ کریں اور کسی بھی مشکوک سرگرمی کی فوری اطلاع قریبی تھانے یا پولیس ہیلپ لائن پر دیں تاکہ امن و امان کو برقرار رکھا جا سکے۔
