لَیّہ (نمائندہ لَیّہ ٹی وی) لَیّہ کے محلہ قادر آباد سے تعلق رکھنے والا 24 سالہ نوجوان شایان کوئٹہ میں ریلوے ٹریک دھماکے کے نتیجے میں شہید ہو گیا، جس کی اطلاع ملتے ہی علاقے میں سوگ کی فضا چھا گئی۔ شہید نوجوان کی قربانی پر اہلِ خانہ، عزیز و اقارب اور اہلِ علاقہ غم سے نڈھال ہو گئے جبکہ شہریوں نے شہید کو زبردست خراجِ عقیدت پیش کیا۔ذرائع کے مطابق کوئٹہ ریلوے ٹریک کے قریب ہونے والے دھماکے میں متعدد افراد متاثر ہوئے، جن میں لَیّہ کا بہادر سپوت شایان بھی شامل تھا، جو دورانِ ڈیوٹی وطن کی حفاظت کے فرائض انجام دے رہا تھا۔ شایان کی شہادت کی خبر سامنے آنے کے بعد اہلِ علاقہ کی بڑی تعداد شہید کے گھر پہنچ گئی اور اہلِ خانہ سے اظہارِ تعزیت کیا۔شہریوں، سماجی شخصیات اور مختلف طبقہ ہائے زندگی سے تعلق رکھنے والے افراد نے کہا کہ وطن کی سلامتی کے لیے دی جانے والی یہ قربانی ہمیشہ یاد رکھی جائے گی۔ انہوں نے کہا کہ قوم اپنے بہادر سپوتوں کی قربانیوں کو کبھی فراموش نہیں کر سکتی، جو ملک کے امن اور سلامتی کے لیے اپنی جانوں کا نذرانہ پیش کرتے ہیں۔اہلِ علاقہ نے حکومت سے مطالبہ کیا کہ دہشت گردی کے واقعات میں ملوث عناصر کے خلاف سخت کارروائی عمل میں لائی جائے تاکہ ملک دشمن قوتوں کے عزائم کو ناکام بنایا جا سکے۔شہید شایان کے لیے خصوصی دعاؤں کا سلسلہ بھی جاری ہے۔ شہریوں نے دعا کی کہ اللہ تعالیٰ شہید کے درجات بلند فرمائے، انہیں جنت الفردوس میں اعلیٰ مقام عطا کرے اور سوگوار خاندان کو صبرِ جمیل نصیب فرمائے۔
