عید الاضحیٰ پر لیّہ میں تمام پتن اور کشتیاں بند رکھنے کا فیصلہ، ضلعی انتظامیہ کا نوٹیفکیشن جاری 27 تا 29 مئی ضلع بھر میں کشتی رانی پر پابندی، خلاف ورزی کرنے والوں کے خلاف قانونی کارروائی ہوگی

لَیّہ (نمائندہ لَیّہ ٹی وی) ضلعی انتظامیہ لَیّہ نے عید الاضحیٰ کے موقع پر شہریوں کی جان و مال کے تحفظ اور ممکنہ حادثات سے بچاؤ کے پیش نظر ضلع بھر میں تمام پتن ہائے اور کشتیوں کو عارضی طور پر بند رکھنے کا فیصلہ کر لیا ہے۔ اس حوالے سے باقاعدہ نوٹیفکیشن بھی جاری کر دیا گیا ہے۔نوٹیفکیشن کے مطابق 27 مئی سے 29 مئی 2026 تک ضلع بھر میں تمام پتن اور کشتیوں کی آمد و رفت مکمل طور پر بند رہے گی جبکہ تمام ٹھیکیداران اور کشتی بان حضرات کو ہدایت کی گئی ہے کہ وہ 26 مئی تک کشتیوں کے شافٹ کھول دیں تاکہ عید کے ایام میں کسی قسم کی غیر قانونی کشتی رانی نہ ہو سکے۔ضلعی انتظامیہ نے واضح کیا ہے کہ عید کے دوران کشتی چلانے یا حکومتی احکامات کی خلاف ورزی کرنے والوں کے خلاف سخت قانونی کارروائی عمل میں لائی جائے گی۔ انتظامیہ کا کہنا ہے کہ یہ اقدام عوامی تحفظ اور ممکنہ حادثات کی روک تھام کے لیے کیا جا رہا ہے۔ضلعی انتظامیہ نے شہریوں سے اپیل کی ہے کہ وہ حکومتی احکامات پر عملدرآمد کو یقینی بنائیں اور متعلقہ اداروں کے ساتھ مکمل تعاون کریں تاکہ عیدالاضحیٰ کے موقع پر امن و امان اور حفاظتی انتظامات کو مؤثر بنایا جا سکے۔