اسلام آباد (نمائندہ لیہ ٹی وی) پاکستان کی ثالثی میں ایران اور امریکہ کے درمیان بالواسطہ مذاکرات جاری ہیں، جن میں ممکنہ معاہدے کے لیے ایک رسمی اور باضابطہ فریم ورک تیار کرنے کی کوشش کی جا رہی ہے۔ایرانی خبر رساں ایجنسی ISNA کے مطابق تہران اور واشنگٹن کے درمیان رابطوں اور بات چیت کا سلسلہ بدستور قائم ہے، جبکہ پاکستان اس حساس سفارتی عمل میں ثالثی کا کردار ادا کر رہا ہے۔رپورٹ میں بتایا گیا ہے کہ دونوں ممالک اس وقت مختلف پیغامات اور مجوزہ مسودات کا تبادلہ کر رہے ہیں تاکہ ایک قابلِ قبول معاہدے کی بنیاد رکھی جا سکے۔ سفارتی ذرائع کے مطابق مذاکرات میں اہم پیش رفت ہوئی ہے اور دونوں فریق تنازعات کے حل کے لیے سنجیدہ کوششیں کر رہے ہیں۔اس سے قبل ایک ایرانی عہدیدار نے ایک ٹی وی چینل سے گفتگو کرتے ہوئے کہا تھا کہ مذاکرات کار کسی معاہدے کے “بہت قریب” پہنچ چکے ہیں اور ایک ابتدائی مسودۂ معاہدہ زیرِ غور ہے۔بین الاقوامی امور کے ماہرین کا کہنا ہے کہ اگر یہ مذاکرات کامیاب ہو جاتے ہیں تو مشرقِ وسطیٰ میں کشیدگی میں کمی، عالمی توانائی منڈی میں استحکام اور خطے میں سفارتی تعلقات کی بہتری کے امکانات روشن ہو سکتے ہیں۔تجزیہ کاروں کے مطابق پاکستان کی ثالثی کا کردار عالمی سطح پر اس کی سفارتی اہمیت کو اجاگر کرتا ہے اور یہ پیش رفت خطے میں امن و استحکام کے لیے مثبت قدم ثابت ہو سکتی ہے۔
