اسلام آباد میں پہلی اور ملتان میں دوسری پوزیشن، لَیّہ گرلز فٹبال ٹیم کے اعزاز میں تقریب ڈپٹی کمشنر آصف علی ڈوگر کی کھلاڑیوں سے ملاقات، خواتین کھیلوں کے فروغ کیلئے ہر ممکن تعاون کی یقین دہانی

لیہ(نمائندہ نگران تھل)اسلام آباد میں پہلی اور ملتان میں دوسری پوزیشن حاصل کرنے والی لیہ گرلز فٹبال ٹیم کے اعزاز میں ڈپٹی کمشنر آفس میں تقریب کا انعقاد کیا گیا۔ ڈپٹی کمشنر لیہ آصف علی ڈوگر نے گرلز فٹبال ٹیم سے ملاقات کی اور شاندار کارکردگی پر کھلاڑیوں کو مبارکباد دی۔اس موقع پر ایڈیشنل ڈپٹی کمشنر جنرل شبیر احمد ڈوگر،ڈسٹرکٹ اکاؤنٹس آفیسر سکینڈ محمد عبدالرحمن،ڈی ایس او امتیاز احمد بھٹی،ٹی ایس او معینہ رفیق و دیگر موجود تھے۔ڈپٹی کمشنر آصف علی ڈوگر نے اس موقع پر کہا کہ لیہ کی باصلاحیت کھلاڑیوں نے مختلف سطح کے مقابلوں میں نمایاں کامیابیاں حاصل کرکے ضلع کا نام روشن کیا ہے اسلام آباد میں پہلی پوزیشن اور ملتان میں دوسری پوزیشن حاصل کرنا ٹیم کی محنت، نظم و ضبط اور بہترین کھیل کا مظہر ہے۔ڈپٹی کمشنر آصف علی ڈوگر نے کہا کہ وزیر اعلیٰ پنجاب کی ہدایت پر خواتین کی کھیلوں کی سرگرمیوں کے فروغ اور باصلاحیت کھلاڑیوں کی سرپرستی کے لیے عملی اقدامات کیے جا رہے ہیں اس لیے گرلز فٹبال ٹیم کی تربیتی کیمپنگ اور دیگر ضروری اخراجات کے لیے ضلع انتظامیہ بھرپور معاونت فراہم کرے گی تاکہ کھلاڑی مزید محنت اور اعتماد کے ساتھ قومی سطح پر کامیابیاں حاصل کر سکیں۔اس موقع پر ٹیم کی کھلاڑیوں نے ضلع انتظامیہ کی جانب سے حوصلہ افزائی اور تعاون کو خوش آئند قرار دیتے ہوئے اس عزم کا اظہار کیا کہ وہ آئندہ بھی نمایاں کامیابیوں کا سلسلہ جاری رکھیں گے۔بعدازاں ڈپٹی کمشنر نے تیکوانڈو کی گرلز ٹیم سے بھی ملاقات کی۔