عیدُالاضحیٰ پر لَیّہ میں صفائی کا جامع پلان تیار، 2823 اہلکار اور 617 گاڑیاں فیلڈ میں ہوں گی آلائشیں کھلے عام پھینکنے والوں کو 50 ہزار روپے جرمانے کی وارننگ، ایک لاکھ 72 ہزار شاپر بیگز تقسیم کیے جائیں گے

لیہ(نمائندہ لیہ ٹی وی ) ڈپٹی کمشنر آصف علی ڈوگر نے کہا ہے کہ عیدالاضحیٰ کے موقع پر ضلع بھر میں صفائی ستھرائی اور آلائشیں اٹھانے کے لیے تمام انتظامات مکمل کر لیے گئے ہیں۔ قربانی کے جانوروں کی آلائشوں کو بروقت ٹھکانے لگانے، عید گاہوں، مساجد اور سڑکوں کی صفائی کے لیے ستھرا پنجاب ایجنسی کے 2823 اہلکار فرائض انجام دیں گے جبکہ صفائی آپریشن میں 617 چھوٹی بڑی گاڑیاں حصہ لیں گی۔ انہوں نے کمیٹی روم میں عیدالاضحیٰ انتظامات کے حوالے سے میڈیا بریفنگ دیتے ہوئے بتایا کہ شہریوں کو سہولت فراہم کرنے کے لیے گھر گھر ایک لاکھ 72 ہزار شاپر بیگ تقسیم کیے جا رہے ہیں تاکہ قربانی کے جانوروں کی آلائشیں مناسب طریقے سے تلف کی جا سکیں۔ ڈپٹی کمشنر نے بتایا کہ ضلع بھر میں 111 ویسٹ کولیکشن پوائنٹس قائم کیے گئے ہیں جبکہ آلائشوں کو ٹھکانے لگانے کے لیے 17 خندقیں بھی تیار کی گئی ہیں۔ صفائی آپریشن کی مانیٹرنگ اور رپورٹنگ کے لیے تین مختلف نوعیت کی ٹیمیں تشکیل دی گئی ہیں جو عید کے ایام میں مسلسل فیلڈ میں موجود رہیں گی۔ انہوں نے شہریوں سے اپیل کی کہ قربانی کے جانوروں کی آلائشیں شاپر بیگز میں ڈال کر مقررہ مقامات پر رکھیں تاکہ عملہ فوری طور پر ویسٹ کلیکٹ کر سکے۔ انہوں نے خبردار کیا کہ کھلے عام آلائشیں پھینکنے والوں کے خلاف کارروائی کی جائے گی اور 50 ہزار روپے تک جرمانہ عائد کیا جا سکتا ہے۔ ڈپٹی کمشنر نے کہا کہ ضلع کو صفائی ستھرائی میں مثالی بنانا ہے، عوام، تاجر برادری، میڈیا نمائندگان اور سوشل ایکٹوسٹ اس مقصد میں اپنا بھر پور کردار ادا کریں۔ اس موقع پر منیجنگ ڈائریکٹر ستھرا پنجاب ایجنسی لیہ شبیر احمد ڈوگر اور اسسٹنٹ کمشنر لیہ زوہیب کریم بھی موجود تھے۔ میڈیا بریفنگ کے دوران میڈیا نمائندگان میں قربانی کے جانوروں کی آلائشوں کے لیے شاپر بیگ بھی تقسیم کیے گئے۔