لَیّہ (نمائندہ لیہ ٹی وی) ڈپٹی کمشنر لَیّہ محمد آصف ڈوگر سے سینیئر صحافی اور سابق صدر ڈسٹرکٹ پریس کلب لَیّہ عبدالرحمان فریدی کی سربراہی میں صحافیوں کے ایک اعلیٰ سطحی وفد نے ملاقات کی۔ وفد میں مفتی محمد نعمان قادر مصطفائی، محمد مرتضیٰ قادری اور ملک مقبول الٰہی بھی شامل تھے۔ملاقات کے دوران ضلع لَیّہ میں جاری ترقیاتی منصوبوں، شہری مسائل، صحت، تعلیم اور عوامی سہولیات سے متعلق امور پر تفصیلی گفتگو کی گئی۔ اس موقع پر ڈپٹی کمشنر محمد آصف ڈوگر نے کہا کہ پنجاب حکومت لَیّہ کے عوام کو بنیادی سہولیات کی فراہمی کیلئے ترجیحی بنیادوں پر اقدامات کر رہی ہے اور بہادر ڈیجیٹل لائبریری اور جنرل ہسپتال اسی سلسلے کی اہم کڑی ہیں۔انہوں نے کہا کہ جنرل ہسپتال لَیّہ شہریوں کیلئے ایک بہترین تحفہ ثابت ہوگا جہاں جدید اور معیاری طبی سہولیات فراہم کی جائیں گی جبکہ بہادر ڈیجیٹل لائبریری، جو گزشتہ پانچ برسوں سے غیر فعال تھی، اب اپنی مدد آپ کے تحت رضا کارانہ کوششوں سے دوبارہ فعال کی جا رہی ہے۔ڈپٹی کمشنر نے بتایا کہ لائبریری کے بیشتر مسائل حل کر لیے گئے ہیں اور یہ منصوبہ جون 2026 تک مکمل طور پر فنکشنل ہو جائے گا تاکہ طلبہ، نوجوانوں اور ریسرچ اسکالرز کو جدید تعلیمی و تحقیقی سہولیات میسر آ سکیں۔انہوں نے مزید کہا کہ ضلع میں صفائی، تجاوزات کے خاتمے، ناجائز منافع خوری کی روک تھام، پارکس کی تزئین و آرائش اور شہری سہولیات کی بہتری کیلئے ہنگامی بنیادوں پر اقدامات جاری ہیں جن کے مثبت نتائج سامنے آ رہے ہیں۔اس موقع پر ڈپٹی کمشنر محمد آصف ڈوگر نے عوامی مسائل کو اجاگر کرنے اور تعمیری صحافت کے فروغ میں میڈیا کے مثبت کردار کو بھی سراہا۔
