لیہ(نمائندہ لیہ ٹی وی) سپرئیر کالج لیہ میں مصطفوی سٹوڈنٹس موومنٹ (MSM) کے زیر اہتمام ملک بھر کی طرح انوویٹرز کیمپ 2026 کا کامیاب انعقاد کیا گیا۔ پروگرام کی قیادت صدر مصطفوی سٹوڈنٹس موومنٹ ضلع لیہ چوہدری صہیب حسن نے کی جبکہ شوکت علی مغل صدر MSM جنوبی پنجاب اور چوہدری ذیشان یوسف صدر MSM سینٹرل پنجاب نے بطور ٹرینرز شرکت کی۔کیمپ کے دوران مقررین نے طلبہ کو خدمتِ دین کی توفیق، امر بالمعروف و نہی عن المنکر، فروغِ عشقِ مصطفیٰ ﷺ، احساسِ ذمہ داری، اوصافِ قیادت، شخصیت سازی، علم و شعور اور ملکی ترقی میں نوجوانوں کے کردار جیسے اہم موضوعات پر جامع لیکچرز دیے۔ٹرینرز نے نوجوانوں کی خود اعتمادی میں اضافہ اور ان کی ابلاغی صلاحیتوں کو بہتر بنانے کیلئے سپیکنگ سکل کی عملی مشق بھی کروائی، جس میں طلبہ نے بھرپور دلچسپی کا اظہار کیا۔ شرکاء کا کہنا تھا کہ اس نوعیت کے تربیتی پروگرام نوجوان نسل میں فکری بیداری، اعتماد اور قیادی صلاحیتیں پیدا کرنے میں اہم کردار ادا کرتے ہیں۔کیمپ میں کثیر تعداد میں طلبہ نے شرکت کی۔ اس موقع پر پروفیسر رائے فیصل عزیز پرنسپل سپرئیر کالج لیہ، علامہ وقاص شاہد ناظم تحریک منہاج القرآن ضلع لیہ اور محمد اسد سیکریٹری سوشل میڈیا MSM لیہ بھی موجود تھے۔مقررین نے طلبہ پر زور دیا کہ وہ علم، عمل اور اعلیٰ اخلاق سے آراستہ ہو کر ملک و ملت کی خدمت میں اپنا مثبت کردار ادا کریں۔
