لیہ(نمائندہ لیہ ٹی وی)ضلع لیہ میں ستھرا پنجاب مہم کے تحت صفائی آپریشن مزید تیز کر دیا گیا۔ مینیجنگ ڈائریکٹر ستھرا پنجاب لیہ شبیر احمد ڈوگر نے عارضی ویسٹ کولیکشن پوائنٹ نزد ریلوے لائن کا دورہ کیا اور وہاں تعینات ورکرز کی کارکردگی کا جائزہ لیا۔ منیجنگ ڈائریکٹر شبیر احمد ڈوگر نے اس موقع پر ہدایت کی کہ عارضی ویسٹ کولیکشن پوائنٹ کو روزانہ کی بنیاد پر مکمل طور پر صاف رکھا جائے جبکہ جمع شدہ کوڑا کرکٹ کو ایس او پیز کے مطابق محفوظ انداز میں مستقل ڈمپنگ سائٹ تک منتقل کیا جائے۔ انہوں نے کہا کہ عید الاضحیٰ کے موقع پر شہریوں کو صاف ستھرا ماحول فراہم کرنے کے لئے صفائی ستھرائی کے مثالی انتظامات یقینی بنائے جائیں اور یہ سلسلہ عید کے ایام میں بھی بلا تعطل جاری رکھا جائے۔ انہوں نے مزید ہدایت کی کہ شہری اور دیہی علاقوں میں یکساں طور پر دیانتداری اور ذمہ داری کے ساتھ فرائض انجام دئیے جائیں تاکہ عوام کو خوشگوار اور صحت مند ماحول میسر آ سکے۔
