لیہ(نمائندہ لیہ ٹی وی)ڈپٹی کمشنر آصف علی ڈوگر کی زیر صدارت ڈسٹرکٹ ایمرجنسی بورڈ کا اہم اجلاس منعقد ہوا جس میں ممکنہ سیلابی صورتحال، ریسکیو و ریلیف آپریشنز اور جاری ہیٹ ویو کے دوران عوام کو ریلیف فراہم کرنے کے اقدامات کا تفصیلی جائزہ لیا گیا۔ اجلاس میں ایڈیشنل ڈپٹی کمشنر جنرل شبیر احمد ڈوگر، ایڈیشنل ڈائریکٹر لائیو سٹاک ڈاکٹر طارق گدارہ، ڈپٹی ڈائریکٹر ڈویلپمنٹ شاہد رحمن، ڈپٹی ڈائریکٹر کالجز ذوالفقار علی حیدری، ڈی ایس پی شوکت، ڈی او ایجوکیشن گل شیر، ضلع کونسل، میونسپل کمیٹیوں، واسا، ہیلتھ، انہار اور متعلقہ محکموں کے افسران نے شرکت کی۔ ڈپٹی کمشنر نے ممکنہ سیلابی صورتحال سے نمٹنے کے لئے تمام اداروں کو الرٹ رہنے اور پیشگی انتظامات مکمل رکھنے کی ہدایت کی۔ انہوں نے فلڈ پروٹیکشن بندوں کی مضبوطی اور مرمت کے کام کو جلد مکمل کرنے، فلڈ بندوں سے تجاوزات کے خاتمے اور حساس مقامات کی مسلسل نگرانی یقینی بنانے کی ہدایات جاری کیں۔ ڈپٹی کمشنر نے ہدایت کی کہ شہری علاقوں میں اربن فلڈنگ سے بچاؤ کے لئے تمام سیوریج اور ڈرینج سسٹم کی ڈی سلٹنگ کی جائے۔ ڈپٹی کمشنر آصف علی ڈوگر نے ہیٹ ویو کے پیش نظر عوامی مقامات پر کارڈ شیڈز، واٹر کولرز اور سپرنکلنگ ٹینکس کے ذریعے پانی کے چھڑکاؤ کے انتظامات کرنے کی بھی ہدایت کی تاکہ شہریوں کو شدید گرمی سے بچایا جا سکے۔ اجلاس کے دوران ڈسٹرکٹ ایمرجنسی آفیسر ڈاکٹر سجاد نے بریفنگ دیتے ہوئے بتایا کہ ممکنہ سیلابی صورتحال کے پیش نظر تحصیل لیہ اور کروڑ لعل عیسن کے نشیبی علاقوں میں 14 ریسکیو پوائنٹس کی نشاندہی کر لی گئی ہے جبکہ ہنگامی حالات میں متاثرہ افراد کی سہولت کے لئے 20 ریلیف کیمپ قائم کئے جائیں گے۔ ریسکیو پوائنٹس پر محکمہ صحت اور لائیو سٹاک کے کیمپ، ڈاکٹرز اور ادویات بھی دستیاب ہوں گی۔ ڈپٹی کمشنر نے تمام متعلقہ اداروں کو باہمی رابطہ مضبوط رکھنے، مشینری اور عملہ ہمہ وقت تیار رکھنے اور کسی بھی ہنگامی صورتحال میں فوری کارروائی یقینی بنانے کی ہدایت کی۔
