جمن شاہ کے قریب ٹرین حادثہ، دو معذور کمسن بچے جاں بحق ریسکیو 1122 کا فوری ریسپانس، لاشیں ورثاء کے حوالے، علاقے میں کہرام

لیہ(نمائندہ لیہ ٹی وی) ویگھی والا بند، کوٹ ادو روڈ جمن شاہ کے قریب ایک افسوسناک ٹرین حادثے میں دو معذور کمسن بچے جاں بحق ہو گئے۔ ریسکیو 1122 کے مطابق حادثہ اس وقت پیش آیا جب 3 اور 4 سالہ بچے ریلوے ٹریک عبور کر رہے تھے کہ اچانک ٹرین کی زد میں آ گئے اور موقع پر ہی دم توڑ گئے۔واقعہ کی اطلاع ملتے ہی ریسکیو 1122 لیہ کے کنٹرول روم نے فوری طور پر قریبی ایمرجنسی ٹیم کو جائے حادثہ پر روانہ کیا۔ ریسکیو اہلکار بروقت موقع پر پہنچے اور پیشہ ورانہ انداز میں امدادی کارروائیاں شروع کرتے ہوئے دونوں بچوں کی لاشیں ٹریک سے ریکور کر لیں۔ریسکیو حکام کے مطابق جاں بحق ہونے والے بچوں کی شناخت 4 سالہ ازان ولد سلطان اور 3 سالہ ارسلان ولد سلطان کے نام سے ہوئی ہے۔ ضروری قانونی کارروائی مکمل کرنے کے بعد پولیس کی موجودگی میں لاشیں ورثاء کے حوالے کر دی گئیں۔حادثے کے بعد پورے علاقے میں غم و افسوس کی فضا چھا گئی جبکہ اہل علاقہ کی بڑی تعداد موقع پر جمع ہو گئی۔ ریسکیو 1122 اہلکاروں نے صورتحال کو قابو میں رکھتے ہوئے امدادی سرگرمیاں مکمل کیں۔ریسکیو 1122 لیہ نے شہریوں سے اپیل کی ہے کہ ریلوے ٹریک کے قریب بچوں کا خصوصی خیال رکھا جائے، خصوصاً معذور اور کم عمر بچوں کو اکیلا نہ چھوڑا جائے اور ریلوے لائن عبور کرتے وقت مکمل احتیاط برتی جائے تاکہ ایسے المناک حادثات سے بچا جا سکے۔