لیہ(نمائندہ لیہ ٹی وی)چوک اعظم کے قریب ٹیل منڈا پل کے مقام پر نہر میں ایک شخص کے ڈوبنے کی اطلاع پر ریسکیو1122نے فوری سرچ اینڈ ریسکیو آپریشن شروع کر دیا۔ریسکیو 1122 کے مطابق ایمرجنسی کال موصول ہوتے ہی کنٹرول روم نے قریبی ایمبولینس اور واٹر ریسکیو ٹیم کو فوری طور پر جائے وقوعہ پر روانہ کیا، جہاں پہنچ کر نہر میں سرچ آپریشن کا آغاز کر دیا گیا۔ ابتدائی اطلاعات کے مطابق ایک شخص کو نہر میں ڈوبتے ہوئے دیکھا گیا تاہم متاثرہ شخص کی شناخت تاحال نہیں ہو سکی۔ریسکیو حکام کے مطابق سرچ آپریشن میں 2 بوٹس، 6 تربیت یافتہ سوئمرز اور 2 ڈائیورز حصہ لے رہے ہیں جبکہ نہر میں پانی کی گہرائی تقریباً 12 فٹ اور پانی کا بہاؤ 426 کیوسک ریکارڈ کیا گیا ہے، جس کے باعث ریسکیو کارروائیوں میں مشکلات کا سامنا ہے۔ریسکیو اہلکار نہر کے مختلف مقامات پر سرچ اینڈ ریسکیو آپریشن جاری رکھے ہوئے ہیں جبکہ مزید امدادی وسائل بھی الرٹ کر دیے گئے ہیں۔
#
