چوک اعظم میں ناقص و مضرِ صحت گوشت کی بھاری کھیپ پکڑی گئی،پنجاب فوڈ اتھارٹی ، پولیس اور لائیو اسٹاک کی مشترکہ کارروائی

لیہ(نمائندہ لیہ ٹی وی)چوک اعظم میں پولیس اور محکمہ لائیو اسٹاک،پنجاب فوڈ اتھارٹی کی مشترکہ کارروائی کے دوران مضرِ صحت اور ناقص گوشت کی بھاری کھیپ برآمد کر لی گئی۔ ذرائع کے مطابق یہ گوشت مختلف علاقوں میں سپلائی کیا جانا تھا، تاہم بروقت کارروائی کے باعث شہریوں کو ممکنہ خطرناک اور غیر معیاری گوشت کے استعمال سے بچا لیا گیا۔کارروائی کے دوران بڑی مقدار میں سلاٹر شدہ گوشت ایک حویلی سے برآمد ہوا۔ ذرائع کا کہنا ہے کہ برآمد ہونے والا گوشت بدنامِ زمانہ نذر حسین عرف نجا قصاب کا بتایا جا رہا ہے، جبکہ جس حویلی سے گوشت برآمد ہوا وہ مبینہ طور پر اس کے داماد کی ملکیت ہے۔اہلِ علاقہ نے الزام عائد کیا ہے کہ بعض سرکاری اہلکاروں نے مبینہ سہولت کاری کرتے ہوئے موقع پر موجود قصابوں کو فرار ہونے کا موقع فراہم کیا، جس پر شہریوں میں شدید تشویش پائی جا رہی ہے۔ مقامی افراد نے واقعے کی شفاف تحقیقات اور ذمہ دار اہلکاروں کے خلاف کارروائی کا مطالبہ کیا ہے۔ذرائع کے مطابق تھانہ چوک اعظم پولیس نے واقعے کا نوٹس لیتے ہوئے ملوث عناصر کے خلاف سخت قانونی کارروائی کا عندیہ دیا ہے، جبکہ برآمد شدہ گوشت کے نمونے مزید جانچ کیلئے لیبارٹری بھجوانے کی بھی اطلاعات ہیں۔