اسلام آباد (لیہ ٹی وی) اسلام آباد ہائی کورٹ نے توشہ خانہ ٹو کیس میں بانی پاکستان تحریک انصاف اور بشریٰ بی بی کی بریت کی درخواستوں پر سماعت کا تحریری حکم نامہ جاری کر دیا۔
ہائی کورٹ کے جسٹس انعام امین منہاس نے 2 صفحات پر مشتمل حکم نامہ جاری کیا، جس میں ایف آئی اے کو پری ایڈمیشن نوٹس جاری کرنے کا حکم دیا گیا۔ عدالت نے ٹرائل روکنے کی حکم امتناع کی درخواست پر بھی ایف آئی اے کو نوٹس جاری کیا۔
تحریری حکم نامے میں کہا گیا کہ درخواست گزاروں نے موقف اختیار کیا ہے کہ ان کے خلاف کیس نہیں بنتا اور انہیں بری کیا جائے۔ درخواست گزار کے وکیل کا کہنا ہے کہ پراسیکیوشن کا کیس 5 وعدہ معاف گواہوں پر مبنی ہے، جو ناکافی ہے۔
عدالت نے اپنے حکم میں یہ بھی کہا کہ وکیل کے مطابق ٹرائل کورٹ تیزی سے کارروائی کر رہی ہے، جو بنیادی حقوق کی خلاف ورزی کے مترادف ہو سکتی ہے۔
واضح رہے کہ عدالت نے فریقین کو نوٹس جاری کرتے ہوئے آئندہ سماعت پر جواب طلب کیا ہے۔
