ملتان(لیہ ٹی وی)وفاقی حکومت کی ہدایت پر جنوبی پنجاب میں بجلی چوری میں ملوث عناصر کےخلاف کریک ڈاون میں شدت لانے کا فیصلہ کیا گیا ہے اور میپکو کے واجبات ادا نہ کرنے والوں کی پراپرٹی قرق کرنےکے لئے ہدایات جاری کر دی گئی ہیں۔عدالتوں میں زیر سماعت بجلی چوری کے کیسسز کی بھرپور پیروی کے لئے بھی حکمت عملی تیار کر لی گئی ہے اور قانون کے مطابق بجلی چور کو 10 سال قید تک کی سزا دلائی جاسکے گی۔ بجلی چوروں کے خلاف سخت اقدامات کے حوالے سے جنوبی پنجاب سیکرٹریٹ میں ایک اعلیٰ سطحی اجلاس منعقد ہوا۔اجلاس کی صدارت ایڈیشنل چیف سیکرٹری ساوتھ پنجاب فواد ہاشم ربانی اور ایڈیشنل آئی جی پولیس ساوتھ پنجاب محمد کامران خان نے کی۔ سیکرٹری سروسز انجیبئر امجد شعیب خان ترین، کمشنر ڈی جی خان ڈاکٹر ناصر محمود بشیر ،کمشنر ملتان مریم خان،کمشنر بہاولپور نادر چٹھہ،آر پی او ملتان محمد سہیل چوہدری اور ایف آئی اے کے افسران نے اجلاس میں شرکت کی جبکہ آر پی او بہاولپور اور آر پی او ڈی جی خان ویڈیو لنک کے ذریعے اجلاس میں شریک ہوئے۔سی ای او میپکو جام گل محمد زاہد نے اجلاس کو بریفنگ دی۔ایڈیشنل چیف سیکرٹری ساوتھ پنجاب فواد ہاشم ربانی نے اجلاس سے خطاب کرتے ہوئے کہا کہ
وفاقی حکومت نے بجلی چوروں کے خلاف سخت کریک ڈاون کی ہدایات جاری کی ہیں۔ انہوں نے بتایا کہ بچلی چوری کی صورت میں لائن لاسسز کا بوجھ عام صارف کو برداشت کرنا پڑتا ہے اور اس طرح حکومت کے اقدامات کی وجہ سے مہنگائی کی شرح میں ہونیوالی کمی بجلی بلوں کے بوجھ تلے دب جاتی ہے۔ فواد ہاشم ربانی نے کہا کہ بجلی سستی کرنے کے لئے حکومت آئی پی پیز کے ساتھ از سر نو معاہدے کررہی ہے اور اس صورتحال میں بجلی چوری روک کر عوام کو مزید ریلیف فراہم کیا جا سکتا ہے۔ ایڈیشنل چیف سیکرٹری ساوتھ پنجاب نے ہدایت کی کہ بجلی چوروں کے خلاف کاروائی کے لئے مختلف سیکیورٹی ایجنسیوں پر مشتمل ٹیموں کو مکمل سپورٹ فراہم کی جائےگی اور تمام کمشنرز میپکو کے واجبات اور جرمانوں کی وصولی کے لئے ریونیو افسران کو متحرک کریں اور واجبات ادا نہ کرنے والوں کی جائیدادیں قرق کر لی جائیں۔ ایڈیشنل آئی جی پولیس جنوبی پنجاب محمد کامران خان نے کہاکہ پولیس کو بجلی چوروں کے خلاف درخواست پر فوری ایف آئی آر درج کرنے کی ہدایت دی گئی ہیں اور بجلی چوروں کے خلاف چھاپوں کے لئے خصوصی نفری فراہم کی گئی ہے۔کمشنر ڈی جی خان ڈاکٹر ناصر محمود بشیر نے کہا کہ ریونیو کاروائی کےلئے میپکو بچلی چوری کرنے والے کا مکمل ڈیٹا فراہم کیا کرے۔کمشنر ملتان مریم خان نے کہا کہ ملتان ڈویژن میں میپکو کو انتظامیہ کی مکمل سپورٹ حاصل ہے۔ کمشنر بہاولپور نادر چٹھہ نے کہا کہ بہاولپور ڈویژن میں 90 فیصد بجلی چوروں کو گرفتار کیا گیا ہے۔انہوں نے کہا کہ بجلی چوری روکنے کےلئے آوٹ دی باکس اقدامت کی ضرورت ہے۔ سی ای او میپکو جام گل محمد زاہد نے اجلاس کو بریفنگ دیتے ہوئے بتایا کہ میپکو لائن لاسسزکی شرح 15.2 فیصد ہے۔گزشتہ ایک سال میں میپکو ریجن میں 40869 بجلی چوروں کے خلاف کاروائی کی گئی اور 39900 بجلی چوروں کے خلاف ایف آئی درج کرائی گئ جبکہ 31536 بجلی چور گرفتار کئے گئے۔انہوں نے بریفنگ میں مزید بتایا کہ بجلی چوروں کو 2ارب 62 کروڑ60 لاکھ روپے جرمانہ کیا گیا اور اب تک1 ارب69 کروڑ 90 لاکھ روپے وصول کئےگئے ہیں۔
