ملتان29اگست ( لیہ ٹی وی) زونل خطیب اوقاف ملتان مفتی حافظ محمد کاشف فریدی نے کہا ہے کہ ملتان براڈ کاسٹنگ کارپوریشن پاکستان، پاکستان ٹیلی ویژن کارپوریشن اور محکمہ اوقاف کے اشتراک سے ہر سال ماہ مقدس ربیع اول شریف کی تقریبات کے سلسلے میں نعت خوانی کے مقابلے منعقد ہوتے ہیں اس سال بھی یہ مقابلے پہلے ڈسٹرکٹ سطح اور پھر صوبائی سطح پر مختلف چار کیٹگریز میں منعقد کروائے جائیں گے۔ کیٹگری نمبر 01 میں 15 سال سے کم عمر نعت خواں لڑکے ، کیٹگری نمبر02 میں 15 سال سے کم عمر نعت خواں لڑکیاں، کیٹگری نمبر 03 میں 15 سال سے 25 سال کے درمیان نعت خواں مرد، کیٹگری نمبر04 میں 15سال سے 25 کے درمیان نعت خواں خواتین حصہ لے سکتے ہیں۔ جن کا شیڈول ملتان میں جامع مسجد ملحقہ دربار حضرت بہاؤالدین زکریا 31اگست 2024 بروز ہفتہ صبح 08 بجے، خانیوال میں جامع مسجد غلہ منڈی 31 اگست 2024 بروز ہفتہ صبح 08 بجے اور لودھراں میں جامع مسجد نالے والی 31 اگست 2024 بروز ہفتہ صبح 08 بجے ہوگا۔ شرائط کے مطابق ان مقابلوں میں شرکت کےلئے اپنا نام و کیٹگری و ایڈریس اس نمبر 0300-2954747 پر sms کریں، مقابلے میں حصہ لینے والے اپنی عمر کے تصدیق ثبوت کی دو عدد عکسی نقل اور تین عدد پاسپورٹ سائز تصاویر قبل از مقابلہ جمع کروائیں گے بصورت دیگر انہیں مقابلے میں شریک نہیں کیا جائے گا۔ مقابلے میں پروفیشنل نعت خواں شریک نہیں ہو سکتے۔
