لیہ: ایڈیشنل ڈپٹی کمشنر انفورسمنٹ محمد اویس سرور کی زیر صدارت پرائس کنٹرول مجسٹریٹس کی کارکردگی سے متعلق اجلاس منعقد ہوا، جس میں صارفین کو ریلیف فراہم کرنے، اشیائے ضروریہ کی قیمتوں کی نگرانی، سرکاری نرخناموں پر عملدرآمد اور گراں فروشی کی روک تھام کے اقدامات کا جائزہ لیا گیا۔
اجلاس میں ایڈیشنل ڈپٹی کمشنر انفورسمنٹ محمد اویس سرور نے ہدایت کی کہ پرائس کنٹرول مجسٹریٹس بازاروں میں اشیائے ضروریہ کی قیمتوں کی مسلسل نگرانی کریں اور مقررہ نرخوں سے زائد قیمتیں وصول کرنے والے دکانداروں کے خلاف بلاامتیاز قانونی کارروائی عمل میں لائیں۔
انہوں نے واضح کیا کہ عوام کو ریلیف کی فراہمی میں غفلت برداشت نہیں کی جائے گی۔ انہوں نے تاجر برادری پر بھی زور دیا کہ وہ سرکاری نرخناموں پر عملدرآمد یقینی بناتے ہوئے ضلعی انتظامیہ سے تعاون کرے تاکہ گراں فروشی کی روک تھام اور صارفین کو مناسب قیمتوں پر اشیائے ضروریہ کی فراہمی ممکن بنائی جا سکے۔
