لیہ: ایڈیشنل ڈپٹی کمشنر میونسپل سروسز شبیر احمد ڈوگر نے بارش کے بعد علی الصبح ڈسٹرکٹ ہیڈ کوارٹر ہسپتال لیہ اور شہر کے مختلف علاقوں کا تفصیلی دورہ کیا اور نکاسیِ آب کے انتظامات کا جائزہ لیا۔اس موقع پر انہوں نے واسا اور میونسپل کمیٹی کے فیلڈ عملے کو ہدایت کی کہ تمام ڈی واٹرنگ سیٹس فوری طور پر فعال کیے جائیں، ڈرینج سسٹم کی صفائی یقینی بنائی جائے اور نشیبی علاقوں سے بارش کے پانی کی جلد از جلد نکاسی کے لیے تمام دستیاب وسائل بروئے کار لائے جائیں۔اے ڈی سی شبیر احمد ڈوگر نے واضح کیا کہ شہریوں کو بارش کے بعد پانی جمع ہونے کے باعث کسی قسم کی مشکلات کا سامنا نہیں ہونا چاہیے۔ انہوں نے متعلقہ عملے کو نکاسیِ آب کے عمل کی مؤثر نگرانی کرنے اور فیلڈ میں موجود رہ کر فوری اقدامات یقینی بنانے کی بھی ہدایت کی۔
