لیہ: ڈپٹی کمشنر آصف علی ڈوگر سے ضلع بھر کے سینئر ڈاکٹرز، کنسلٹنٹس اور نجی میڈیکل ہسپتالوں کے چیف ایگزیکٹوز نے ملاقات کی، جس میں ضلع میں جدید طبی سہولیات کی فراہمی، نیورو سرجری سمیت مختلف طبی شعبہ جات کے قیام، میل و فی میل نرسنگ کالجز کے قیام اور ضلع کی تعمیر و ترقی و خوبصورتی کے امور پر تفصیلی تبادلہ خیال کیا گیا۔ ملاقات میں ایڈیشنل ڈپٹی کمشنر سوشل سروسز خضر ظہور اور چیف ایگزیکٹو آفیسر ہیلتھ ڈاکٹر شاہد ریاض بھی موجود تھے۔
اس موقع پر ڈپٹی کمشنر آصف علی ڈوگر نے کہا کہ شعبہ طب میں لیہ کے ڈاکٹرز کی خدمات قابلِ قدر ہیں۔ ضلع لیہ سے میرٹ پر میڈیکل کے شعبے میں کامیابی حاصل کرنے والے طلبہ کی تعداد دیگر اضلاع کے مقابلے میں زیادہ ہے، جو نوجوانوں کی صلاحیتوں اور تعلیمی قابلیت کا ثبوت ہے۔
انہوں نے کہا کہ وزیر اعلیٰ پنجاب مریم نواز شریف کی جانب سے ضلع لیہ میں جنرل ہسپتال کی جلد تکمیل اور میڈیکل کالج کی تعمیر کے اعلانات پر عمل درآمد جاری ہے۔ ان منصوبوں کی تکمیل سے مقامی آبادی کو جدید طبی سہولیات میسر آئیں گی اور علاج معالجے کے لیے دیگر بڑے شہروں کا رخ کرنے کی ضرورت کم ہو گی۔
ڈپٹی کمشنر نے کہا کہ معیاری طبی سہولیات کی فراہمی اور نرسنگ کے شعبے کو فروغ دینے کے لیے ماہرین کی تجاویز اہمیت رکھتی ہیں۔ نیورو سرجری سمیت مختلف طبی شعبہ جات کی سہولیات اور میل و فی میل نرسنگ کالجز کا قیام ضلع کے صحت کے نظام کو مزید مستحکم بنانے میں معاون ثابت ہو سکتا ہے۔
انہوں نے سینئر ڈاکٹرز، کنسلٹنٹس اور نجی ہسپتالوں کے چیف ایگزیکٹوز پر زور دیا کہ وہ شعبہ طب کے ساتھ ساتھ ضلع کی فلاح و بہبود، تعمیر و ترقی اور خوبصورتی کے لیے بھی رضاکارانہ کردار ادا کریں، تاکہ سرکاری و نجی شعبے کے باہمی تعاون سے لیہ کو مزید ترقی یافتہ اور خوبصورت ضلع بنایا جا سکے۔
