لیہ: لیہ کے سب سے بڑے سپورٹس ایونٹ لیہ فٹبال لیگ کے آغاز میں صرف 6 دن باقی رہ گئے، لیگ کے انتظامات کو حتمی شکل دے دی گئی۔ 9 اکتوبر کو سپورٹس کمپلیکس لیہ میں لیگ کا افتتاحی میچ کھیلا جائے گا، جبکہ لیگ کے دوران شائقین کو بہترین کھیل اور تفریحی ماحول فراہم کرنے کے لئے تمام ضروری انتظامات مکمل کر لئے گئے ہیں۔ اس سلسلہ میں ڈپٹی کمشنر آصف علی ڈوگر کی زیر صدارت کمیٹی روم میں انتظامات کا جائزہ اجلاس منعقد ہوا۔ اجلاس میں ایڈیشنل ڈپٹی کمشنر ہیڈ کوارٹر اویس سرور، اسسٹنٹ کمشنر لیہ زوہیب کریم، ایس ڈی ای او پیرا محمد طاہر، ڈپٹی ڈائریکٹر کالجز ذوالفقار علی حیدری، ڈی او ایجوکیشن گل شیر، ڈپٹی ڈائریکٹر فوڈ اتھارٹی وقار بودلہ، سی او ضلع کونسل محمد فیصل، ڈسٹرکٹ سپورٹس آفیسر امتیاز احمد بھٹی، فٹبال کوچ عارف چھینہ اور متعلقہ افسران نے شرکت کی۔ اجلاس میں بریفنگ دیتے ہوئے بتایا گیا کہ سپورٹس کمپلیکس میں فٹبال گراؤنڈ کو مکمل طور پر تیار کر لیا گیا ہے۔ شائقین اور کھلاڑیوں کی سہولت کے لئے مصنوعی روشنیوں، بیٹھنے، پینے کے صاف پانی، فوڈ سٹریٹ اور پارکنگ سمیت دیگر انتظامات بھی مکمل کر لئے گئے ہیں۔ لیگ کے میچز کے دوران سکیورٹی، ٹریفک مینجمنٹ، صفائی ستھرائی اور دیگر انتظامات کو بھی یقینی بنایا جائے گا۔ اس موقع پر ڈپٹی کمشنر آصف علی ڈوگر نے کہا کہ لیہ فٹبال لیگ ضلع میں کھیلوں کے فروغ کے حوالے سے اہم ایونٹ ہے، جس کے ذریعے نوجوانوں کو اپنی صلاحیتوں کے اظہار کا بھرپور موقع ملے گا۔ انہوں نے متعلقہ افسران کو ہدایت کی کہ لیگ کے تمام انتظامات کو بہترین انداز میں یقینی بنایا جائے اور شائقین کو معیاری سہولیات فراہم کی جائیں۔ انہوں نے کہا کہ کھیلوں کے میدان آباد کرنے سے نوجوانوں کو مثبت سرگرمیوں کی جانب راغب کیا جا سکتا ہے۔ ڈپٹی کمشنر نے لیگ کے دوران صفائی، پارکنگ، پینے کے پانی، روشنی، بجلی کے متبادل انتظام اور دیگر بنیادی سہولیات کی مسلسل مانیٹرنگ کی بھی ہدایت کی۔ لیہ فٹبال لیگ کا افتتاحی میچ 9 اکتوبر کو سپورٹس کمپلیکس لیہ میں کھیلا جائے گا اس موقع پر میوزیکل نائٹ اور آتش بازی کا شاندار مظاہرہ بھی کیا جائے گا۔ لیہ فٹبال لیگ میں ملک بھر سے مایا ناز پلیئرز پر مشتمل مختلف ڈیپارٹمنٹ کی ٹیمیں حصہ لیں گی جس سے شائقین فٹبال کو بھرپور اور سنسنی خیز مقابلے دیکھنے کو ملیں گے۔
