لیہ: ڈی پی او لیہ حسن جاوید بھٹی نے پریس کانفرنس میں بتایا ہے کہ پولیس نے سائنسی بنیادوں، سیف سٹی کیمروں، فیشل ریکگنیشن سافٹ ویئر، سی ڈی آر اور ہیومن سورسز کی مدد سے بچوں کو مبینہ طور پر اغوا کرنے کے کیس میں دونوں ملزمان کو گرفتار کرلیا۔ ڈی پی او کے مطابق ایک بچے کو مجاہدہ آباد پٹرول پمپ کے قریب بے ہوشی کی حالت میں چھوڑ دیا گیا تھا، جسے ریسکیو 1122 نے طبی امداد کے لیے ہسپتال منتقل کیا۔ پولیس نے دوسرے بچے کی جانب سے فراہم کردہ معلومات اور سیف سٹی کیمروں کی مدد سے نامعلوم ملزم کی شناخت کا عمل شروع کیا۔
حسن جاوید بھٹی کے مطابق سیف سٹی کیمروں سے حاصل تصاویر کو فیشل ریکگنیشن سافٹ ویئر کے ذریعے مشتبہ افراد کے ریکارڈ سے میچ کیا گیا، بعدازاں آئی ٹی ٹیم، سی ڈی آر اور دیگر ذرائع سے ملزم کو ٹریس کرکے گرفتار کیا گیا۔ گرفتار ملزم غلام رضا کی نشاندہی پر دوسرے ملزم فضل عباس کو بھی گرفتار کرلیا گیا۔ پولیس نے موقع سے مبینہ طور پر بچوں کو نشہ آور چیز پلانے کے لیے استعمال ہونے والی بوتل، دیگر شواہد اور واردات میں استعمال ہونے والی موٹر سائیکل بھی قبضے میں لے کر فرانزک کے لیے بھجوا دی۔
ڈی پی او نے بتایا کہ کیس میں سائنسی بنیادوں پر مضبوط شواہد اکٹھے کیے گئے ہیں تاکہ ملزمان کو قانون کے مطابق سخت سزا دلوائی جا سکے۔ انہوں نے والدین پر زور دیا کہ کم عمر بچوں کی حفاظت پر خصوصی توجہ دیں اور انہیں بلا ضرورت اکیلا نہ چھوڑیں۔
ڈی پی او حسن جاوید بھٹی نے مزید بتایا کہ کوٹ سلطان پولیس نے کارروائی کرتے ہوئےنان کسٹم پیڈ سگریٹ کے 4,860 ڈنڈے بھی برآمد کیے جن کی مالیت تقریباً ایک کروڑ روپے بتائی گئی ہے۔ پولیس نے مزید تفتیش شروع کردی ہے اور مقامی سہولت کاروں و نیٹ ورک سے متعلق معلومات بھی حاصل کی جا رہی ہیں۔ پریس کانفرنس کے موقع پر ڈی ایس پی صدر سید مصطفیٰ کمال شاہ سمیت پولیس افسران بھی موجود تھے۔
