لیہ:ڈپٹی کمشنر آصف علی ڈوگر کی زیر صدارت محکمہ سیکرٹری آر ٹی اے سے متعلق اجلاس منعقد ہوا۔اجلاس میں ایڈیشنل ڈپٹی کمشنرز شبیر احمد ڈوگر،محمد اویس سرور،اسسٹنٹ کمشنر/سیکرٹری آر ٹی اے رانا زوہیب کریم سمیت متعلقہ افسران نے شرکت کی۔اجلاس میں ضلع بھر میں پبلک ٹرانسپورٹ کے نظام، مقررہ کرایہ جات پر عملدرآمد، گاڑیوں کی فٹنس، اوورلوڈنگ اور بس اڈوں کی نگرانی سے متعلق امور کا جائزہ لیا گیا۔ڈپٹی کمشنر آصف علی ڈوگر نے اس موقع پر کہا کہ وزیر اعلیٰ پنجاب مریم نواز شریف کی ہدایات کے مطابق مسافروں کو سفری سہولیات کی فراہمی اور مقررہ کرایہ جات پر عملدرآمد ہر صورت یقینی بنایا جائے۔ انہوں نے ہدایت کی کہ ٹرانسپورٹرز اور مسافروں کے حقوق کا یکساں خیال رکھا جائے اور کسی بھی مسافر سے سرکاری مقررہ کرایہ سے زائد وصولی نہ ہونے دی جائے۔ کرایہ ناموں کو نمایاں مقامات پر آویزاں کروایا جائے تاکہ مسافروں کو مقررہ کرایہ جات سے مکمل آگاہی حاصل ہو سکے۔ڈپٹی کمشنر نے سیکرٹری آر ٹی اے کو ہدایت کی کہ ٹرانسپورٹ اڈہ جات کی باقاعدگی سے چیکنگ کی جائے جبکہ پبلک ٹرانسپورٹ گاڑیوں کی فٹنس اور روٹ پرمٹس بھی چیک کیے جائیں۔ انہوں نے کہا کہ اوورلوڈنگ کی روک تھام کے لیے مؤثر اقدامات کیے جائیں اور غیر فٹ گاڑیوں کو سڑکوں پر چلنے کی اجازت نہ دی جائے تاکہ شہریوں کا محفوظ سفر یقینی بنایا جا سکے۔ڈپٹی کمشنر نے کہا کہ ٹرانسپورٹرز اور اڈہ مالکان کو بلاوجہ تنگ یا ہراساں کرنے کی شکایات برداشت نہیں کی جائیں گی فرائض کی انجام دہی میں کسی قسم کی بدعنوانی یا اختیارات کے ناجائز استعمال میں ملوث اہلکاروں کے خلاف محکمانہ کارروائی عمل میں لائی جائے گی اور ایسے عناصر کو محکمہ میں رہنے کا کوئی جواز نہیں ہوگا۔ڈپٹی کمشنر نے مزید کہا کہ قانون اور ضابطے کی خلاف ورزی پر کارروائی ضرور کی جائے تاہم کسی بھی ٹرانسپورٹر کے ساتھ بلاجواز زیادتی نہ ہو تمام افسران و اہلکار میرٹ، شفافیت اور قانون کے مطابق فرائض سرانجام دیں اور ٹرانسپورٹرز کو بھی حکومتی ہدایات پر مکمل عملدرآمد کا پابند بنایا جائے۔
