لیہ: وزیراعلیٰ پنجاب مریم نواز شریف کی ہدایات پر ہسپتالوں میں فائر سیفٹی اور ہنگامی صورتحال سے نمٹنے کی تیاریوں کا جائزہ لینے کے سلسلہ میں ڈی ایچ کیو ہسپتال لیہ میں موک ایمرجنسی ایکسرسائز کا انعقاد کیا گیا۔ ریسکیو 1122، سول ڈیفنس اور ڈی ایچ کیو ہسپتال کے سٹاف نے مشترکہ طور پر فرضی ہنگامی صورتحال میں فوری اور مؤثر رسپانس کا عملی مظاہرہ کیا۔ ایڈیشنل ڈپٹی کمشنر میونسپل سروسز شبیر احمد ڈوگر نے موک ایکسر سائز کی نگرانی کی۔اس موقع پر اسسٹنٹ کمشنر رانا زوہیب کریم،ایس ڈی ای او پیرا ام حبیبہ قریشی،ڈسٹرکٹ ایمرجنسی آفیسر ڈاکٹر سجاد احمد،سول ڈیفنس آفیسر توقیر احمد، ایم ایس ڈی ایچ کیو ہسپتال ڈاکٹر حیات اللہ،ریسکیو 1122، سول ڈیفنس اور ہسپتال کا سٹاف موجود تھا۔ موک ایمرجنسی ایکسرسائز کے دوران میں فرضی آگ لگنے کی صورتحال پیدا کرکے فوری طور پر ایمرجنسی الارم بجایا گیا اور متعلقہ عملے کی جانب سے ہنگامی صورتحال میں بروقت رسپانس کا عملی مظاہرہ کیا گیا۔ ریسکیو 1122 اور سول ڈیفنس اہلکاروں نے آگ بجھانے کے آلات کے ذریعے آگ پر قابو پانے کا عملی مظاہرہ کیا جبکہ ڈی ایچ کیو ہسپتال کے سکیورٹی و دیگر متعلقہ عملے کو بھی ابتدائی طور پر آگ بجھانے اور ہنگامی صورتحال میں فوری اقدامات کے حوالے سے عملی تربیت فراہم کی گئی۔ مشق کے دوران عملے کو بتایا گیا کہ کسی بھی ناخوشگوار واقعہ کی صورت میں ریسکیو ٹیموں کے پہنچنے سے قبل ابتدائی حفاظتی اقدامات کس طرح بروقت کیے جائیں، فائر فائٹنگ آلات کا درست استعمال کیسے کیا جائے اور مریضوں و دیگر افراد کو محفوظ رکھنے کے لیے فوری رسپانس کیسے یقینی بنایا جائے۔ موک ایکسرسائز کے دوران فرضی طور پر زخمی ہونے والے افراد کو ابتدائی طبی امداد فراہم کرنے اور ان کے زخموں پر پٹیاں باندھنے کا عملی مظاہرہ بھی کیا گیا۔ اس موقع پر ہنگامی صورتحال میں خطرے کی بروقت اطلاع، فائر فائٹنگ آلات کے مؤثر استعمال، ایمرجنسی رسپانس اور متعلقہ اداروں کے باہمی رابطہ کار کا بھی جائزہ لیا گیا۔ ایڈیشنل ڈپٹی کمشنر شبیر احمد ڈوگر نے اس موقع پر کہا کہ ہسپتال میں کسی بھی ممکنہ ہنگامی صورتحال سے نمٹنے کے لیے متعلقہ اداروں اور عملے کو ہر وقت الرٹ رہنا چاہیے۔ انہوں نے کہا کہ فائر سیفٹی کے حوالے سے حفاظتی انتظامات اور عملی تربیت کا مقصد کسی بھی ناخوشگوار واقعہ کی صورت میں جانی نقصان کو کم سے کم کرنا ہے۔ انہوں نے ہسپتال انتظامیہ اور متعلقہ اہلکاروں کو ہدایت کی کہ فائر سیفٹی انتظامات پر نظر رکھی جائے، ہنگامی راستوں اور حفاظتی آلات کو قابل استعمال حالت میں رکھا جائے اور کسی بھی ممکنہ خطرے یا غیر معمولی صورتحال کی فوری اطلاع متعلقہ اداروں کو دی جائے۔ انہوں نے کہا کہ ریسکیو 1122، سول ڈیفنس اور ہسپتال کے عملے کی عملی تربیت اور باہمی رابطہ کاری کو مزید مؤثر بنایا جائے تاکہ کسی بھی ہنگامی صورتحال میں فوری کارروائی یقینی بنائی جا سکے۔
