لیہ: وزیراعلیٰ پنجاب مریم نواز شریف کی خصوصی مہم "سیف پنجاب” کے سلسلے میں ڈی ایس پی پٹرولنگ ضلع لیہ راؤ عمر فاروق نے پی ایچ پی پوسٹ لدھانہ موڑ کے بیٹ ایریا میں موٹر سائیکل سواروں کو روڈ سیفٹی کے حوالے سے آگاہی لیکچر دیا۔ اس موقع پر موٹر سائیکل سواروں کو ہیلمٹ کے لازمی استعمال سمیت بیک ویو اور سائیڈ ویو مررز کی اہمیت و افادیت سے آگاہ کیا گیا اور بتایا گیا کہ حفاظتی اقدامات پر عملدرآمد حادثات کی روک تھام اور قیمتی انسانی جانوں کے تحفظ میں اہم کردار ادا کرتا ہے۔ ڈی ایس پی پٹرولنگ ضلع لیہ راؤ عمر فاروق نے کہا کہ وزیراعلیٰ پنجاب مریم نواز شریف کی "سیف پنجاب” مہم کے تحت روڈ سیفٹی اور عوام کے محفوظ سفر کو یقینی بنانے کے لیے آگاہی سرگرمیوں کا سلسلہ جاری رکھا جائے گا۔ انہوں نے کہا کہ حادثات کی روک تھام کے لیے موٹر سائیکل سواروں میں حفاظتی تدابیر اختیار کرنے، ہیلمٹ کے استعمال اور ٹریفک قوانین کی پابندی کے حوالے سے شعور اجاگر کرنا وقت کی اہم ضرورت ہے۔ مزید برآں انچارج پی ایچ پی پوسٹ لدھانہ موڑ ناصر عباس سب انسپکٹر کی جانب سے موٹر سائیکل سواروں میں سائیڈ ویو مررز کے استعمال کے حوالے سے خصوصی آگاہی مہم چلائی گئی جس کے دوران مختلف موٹر سائیکل سواروں میں سائیڈ ویو مررز تقسیم کیے گئے اور انہیں ٹریفک قوانین کی پابندی، محتاط ڈرائیونگ اور محفوظ سفری اصول اپنانے کی تلقین کی گئی۔
