لیہ: ایڈیشنل ڈپٹی کمشنر ہیڈ کوارٹر محمد اویس سرور کی زیر صدارت ڈسٹرکٹ ڈرگ کوالٹی کنٹرول بورڈ کا اجلاس منعقد ہوا۔ اجلاس میں ڈاکٹر محمد یونس کلیہ، ممبر بورڈ ڈاکٹر عبدالعزیز، سیکرٹری بورڈ عامر شکیل، ڈرگ انسپکٹرز عدنان کمال اور اویس قمر نے شرکت کی۔ اجلاس کے دوران مجموعی طور پر 19 کیسز کا جائزہ لیا گیا۔ بورڈ نے ایک کیس ڈرگ کورٹ بھجوانے، نو کیسز میں وارننگ جاری کرنے اور چھ کیسز کے دوبارہ معائنہ کے فیصلے کیے جبکہ تین کیسز کو فی الحال سیل رکھنے کے احکامات جاری کیے گئے۔ اجلاس سے خطاب کرتے ہوئے ایڈیشنل ڈپٹی کمشنر ہیڈ کوارٹر محمد اویس سرور نے کہا کہ ادویات کے معیار اور عوام کی صحت کے معاملے میں کسی قسم کی غفلت برداشت نہیں کی جائے گی۔ انہوں نے کہا کہ ڈرگ قوانین کی خلاف ورزی پر قانون کے مطابق کارروائی عمل میں لائی جائے اور ادویات کی فروخت سے وابستہ تمام افراد مقررہ قواعد و ضوابط کی مکمل پابندی یقینی بنائیں۔ انہوں نے مزید کہا کہ انسانی جانوں سے کھیلنے کی کسی کو اجازت نہیں دی جائے گی، شہریوں کو معیاری اور محفوظ ادویات کی فراہمی کے لیے نگرانی کا عمل مزید مؤثر بنایا جائے گا اور خلاف ورزی کے مرتکب عناصر کے خلاف بلاامتیاز کارروائی جاری رکھی جائے گی۔
