لاہور (نیوز ڈیسک)وزیر تعلیم پنجاب رانا سکندر حیات نے کہا ہے کہ وزیراعلیٰ پنجاب مریم نواز شریف کے وژن کے تحت صوبہ بھر میں 300 نواز شریف اسکول آف ایمیننس قائم کر دیے گئے ہیں، جہاں جدید سہولیات کے ساتھ معیاری اور مفت تعلیم فراہم کی جائے گی۔
ویڈیو پیغام میں وزیر تعلیم نے کہا کہ وزیراعلیٰ مریم نواز شریف نے ایک اسکول کے بچے کے ہاتھوں افتتاح کروا کر منفرد مثال قائم کی ہے۔ انہوں نے کہا کہ نواز شریف اسکول آف ایمیننس معیاری اور مفت تعلیم کے حکومتی وعدے کی عملی تعبیر ہیں اور آج سے ڈویژنل سطح پر باقاعدہ فعال ہونا شروع ہو گئے ہیں۔
رانا سکندر حیات نے بتایا کہ یہ منصوبہ **پبلک پرائیویٹ پارٹنرشپ کے تحت قائم کیا گیا ہے اور عالمی معیار کی تعلیمی سہولیات سے آراستہ ہے۔ ان اسکولوں میں **اسمارٹ کلاس رومز، روبوٹکس، سائنس، کمپیوٹر اور اسٹیم (STEM) لیبز سمیت جدید تعلیمی سہولیات فراہم کی گئی ہیں۔
انہوں نے کہا کہ حکومت پنجاب کا ہدف ہے کہ ان اسکولوں میں ہر سال5 سے 10 لاکھ بچوںکو مفت تعلیم فراہم کی جائے، جبکہ مستقبل میں اس منصوبے کا دائرہ کار مزید وسیع کیا جائے گا۔
وزیر تعلیم کا کہنا تھا کہ اگر حکومت خود ایسے ماڈل ادارے تعمیر اور چلاتی تو اس پر اربوں روپے خرچ ہوتے، تاہم پبلک پرائیویٹ پارٹنرشپ کے ذریعے قومی خزانے پر اضافی بوجھ ڈالے بغیر جدید تعلیمی ادارے قائم کیے گئے ہیں۔
انہوں نے مزید کہا کہ ریکارڈ تعداد میں طلبہ کا داخلہ ٹیسٹ دینا اس بات کا ثبوت ہے کہ والدین کا سرکاری تعلیمی نظام پر اعتماد بحال ہو رہا ہے۔ ان کے مطابق نواز شریف اسکول آف ایمیننس ایسے ادارے ہیں جہاں **امیر اور غریب کا بچہ ایک ہی چھت تلے یکساں معیار کی تعلیم حاصل کرے گا۔
