جم خانہ کلب لیہ کی تعمیر میں تیزی، ڈپٹی کمشنر آصف علی ڈوگر کا دورہ، دو شفٹوں میں کام مکمل کرنے کی ہدایت
لیہ (نمائندہ لیہ ٹی وی) ضلع لیہ میں جاری ترقیاتی منصوبوں پر کام کی رفتار مزید تیز کر دی گئی ہے۔ ڈپٹی کمشنر آصف علی ڈوگر نے ترقیاتی منصوبوں کی بروقت تکمیل اور اعلیٰ معیار کو یقینی بنانے کے لیے خود فیلڈ میں متحرک ہوتے ہوئے سول کلب/جم خانہ کلب لیہ میں جاری تعمیراتی کاموں کا تفصیلی معائنہ کیا۔
دورے کے دوران ڈپٹی کمشنر نے منصوبے پر ہونے والی پیش رفت، تعمیراتی معیار اور کام کی رفتار کا جائزہ لیا، جبکہ متعلقہ افسران بھی ان کے ہمراہ موجود تھے۔
اس موقع پر ڈپٹی کمشنر آصف علی ڈوگر نے متعلقہ افسران اور کنٹریکٹر کو ہدایت کی کہ جم خانہ کلب کی جلد تکمیل اور فعالیت کے لیے تعمیراتی کام دو شفٹوں میں جاری رکھا جائے تاکہ منصوبہ مقررہ مدت کے اندر مکمل ہو سکے۔
انہوں نے واضح کیا کہ تعمیراتی سرگرمیوں میں معیار پر کسی قسم کا سمجھوتہ برداشت نہیں کیا جائے گا اور تمام کام اعلیٰ معیار کے مطابق مکمل کیے جائیں۔
ڈپٹی کمشنر کا کہنا تھا کہ جم خانہ کلب کی تکمیل سے ضلع لیہ کے شہریوں کو جدید، معیاری، تفریحی اور سماجی سہولیات میسر آئیں گی، لہٰذا منصوبے کی بروقت تکمیل کے لیے تمام دستیاب وسائل بروئے کار لائے جائیں۔
