لیہ(نمائندہ لیہ ٹی وی )ضلع لیہ میں 16 اگست کو منعقد ہونے والے ایم ڈی کیٹ ٹیسٹ کے شفاف، منظم اور پرامن انعقاد کے لیے انتظامات کو حتمی شکل دی جا رہی ہے۔ اس سلسلہ میں اعلی سطحی ویڈیو لنک اجلاس کے بعد ڈپٹی کمشنر لیہ آصف علی ڈوگر نے تمام متعلقہ محکموں کو اپنی ذمہ داریاں بروقت مکمل کرنے اور امتحانی مراکز پر بہترین سہولیات کی فراہمی یقینی بنانے کی ہدایت جاری کیں۔ڈپٹی کمشنر نے کہا کہ ضلع لیہ میں قائم دونوں امتحانی مراکز، گورنمنٹ گرلز ڈگری کالج لیہ اور یونیورسٹی آف لیہ سٹی کیمپس میں تمام انتظامات بروقت مکمل کیے جائیں۔ انہوں نے کہا کہ ضلع لیہ سے 1602 امیدوار ایم ڈی کیٹ ٹیسٹ میں شرکت کریں گے جبکہ ڈپٹی ڈائریکٹر کالجز ذوالفقار حیدری ٹیسٹ کے فوکل پرسن ہوں گے۔ڈپٹی کمشنر آصف علی ڈوگر نے متعلقہ محکموں کو ہدایت کی کہ امتحانی مراکز پر صاف اور ٹھنڈے پینے کے پانی، بجلی کی بلا تعطل فراہمی، مناسب نشستوں، بنیادی سہولیات، والدین اور دیگر افراد کے لیے انتظار گاہ، فول پروف سکیورٹی، ٹریفک مینجمنٹ، راستوں کی کلیئرنس اور امیدواروں کے موبائل فون جمع کرانے کے لیے محفوظ موبائل کلیکشن کاؤنٹر کے انتظامات ہر صورت مکمل کیے جائیں۔انہوں نے مزید ہدایت کی کہ امتحان کے روز امتحانی مراکز اور ان کے اطراف دفعہ 144 کے نفاذ سمیت تمام حفاظتی اقدامات پر مؤثر عملدرآمد یقینی بنایا جائے، غیر متعلقہ افراد کے داخلے پر پابندی عائد کی جائے اور تمام متعلقہ محکمے باہمی رابطے کے ساتھ اپنی ذمہ داریاں انجام دیں تاکہ ایم ڈی کیٹ ٹیسٹ 2026 کا انعقاد شفاف، منظم، پرامن اور خوش اسلوبی سے ممکن بنایا جا سکے۔
