لیہ(نمائندہ لیہ ٹی وی ) وزیراعلیٰ پنجاب مریم نواز شریف کے احکامات پر عوام کے حقوق کے تحفظ، معیاری خدمات کی فراہمی اور پٹرولیم مصنوعات کی درست پیمائش کو یقینی بنانے کے لیے ضلع بھر میں پٹرول پمپس کی انسپکشن کا سلسلہ جاری ہے۔ اسی سلسلے میں ڈپٹی کمشنر لیہ آصف علی ڈوگر کی ہدایت پر ایس ڈی او پیرا ام حبیبہ قریشی نے ہیرا اڈہ میں مختلف پٹرول پمپس کا اچانک معائنہ کیا۔انسپکشن کے دوران پٹرول ڈسپنسنگ مشینوں کی پیمائش، ریکارڈ اور دیگر متعلقہ امور کا تفصیلی جائزہ لیا گیا۔چیکنگ کے دوران پٹرول پمپ پر پٹرول اور ڈیزل دونوں کی پیمائش میں 50 ملی لیٹر کمی پائی گئی جس پر متعلقہ پٹرول پمپ انتظامیہ کے خلاف قواعد و ضوابط کے مطابق کارروائی کرتے ہوئے جرمانہ عائد کیا گیا۔ اس موقع پرایس ڈی او پیرا ام حبیبہ قریشی نے کہا کہ وزیراعلیٰ پنجاب مریم نواز شریف کے وژن کے مطابق صارفین کے حقوق کا تحفظ حکومت پنجاب کی اولین ترجیح ہے۔ انہوں نے کہا کہ پیمائش میں کمی، ملاوٹ یا کسی بھی قسم کی بے ضابطگی کسی صورت برداشت نہیں کی جائے گی اور خلاف ورزی کے مرتکب عناصر کے خلاف بلاامتیاز قانونی کارروائی جاری رہے گی تاکہ عوام کو مکمل مقدار، معیاری پٹرولیم مصنوعات اور شفاف خدمات کی فراہمی یقینی بنائی جا سکے۔
