لیہ( نمائندہ لیہ ٹی وی )وزیراعلیٰ پنجاب مریم نواز شریف کے احکامات پر ضلع لیہ میں تجاوزات کے خلاف بلاامتیاز کارروائیوں کا سلسلہ جاری ہے۔ اس ضمن میں ایس ڈی ای او پیرا ام حبیبہ قریشی نے چوک اعظم کے مختلف مقامات پر انسدادِ تجاوزات آپریشن کرتے ہوئے تجاوزات کے خلاف موقع پر کارروائی کی۔ کارروائی کے دوران خلاف ورزی کرنے والوں کو جرمانے عائد کیے گئے جبکہ غیر قانونی طور پر قائم ریڑھیوں کو ہٹا دیا گیا، مسلسل خلاف ورزی پر دکانیں سیل کر دی گئیں۔ ایس ڈی ای او پیرا ام حبیبہ قریشی نے کہا کہ تجاوزات شہری حسن کو متاثر کرنے کے ساتھ بازاروں اور عوامی گزرگاہوں میں آمدورفت کی راہ میں رکاوٹ بنتی ہیں اس لیے ان کے خاتمے کے لیے بلاامتیاز کارروائیاں جاری رکھی جائیں گی۔ انہوں نے کہا کہ بار بار خلاف ورزی کرنے والوں کے خلاف قانونی کارروائی عمل میں لائی جائے گی اور کسی کو بھی عوامی راستوں اور بازاروں میں تجاوزات قائم کرنے کی اجازت نہیں دی جائے گی۔ انہوں نے شہریوں اور کاروباری افراد پر زور دیا کہ وہ تجاوزات سے گریز کرتے ہوئے بازاروں میں نظم و ضبط برقرار رکھنے اور شہریوں کے لیے آسان آمدورفت یقینی بنانے میں انتظامیہ سے تعاون کریں۔
