لیہ( نمائندہ لیہ ٹی وی ) اسسٹنٹ کمشنر لیہ زوہیب کریم کی زیر صدارت سیف سٹی منصوبے کو ضلع لیہ میں یونین کونسل کی سطح تک توسیع دینے کے سلسلے میں اجلاس منعقد ہوا۔اجلاس میں منیجر سیف سٹی لیہ عبدالاحد، ڈی ایس پی صدر عمران خورشید، ایس ایچ اوز سٹی،ضلع بھر کی یونین کونسلوں کے سیکرٹریز نے شرکت کی۔ منیجر سیف سٹی لیہ عبدالاحد نے اجلاس کو منصوبے کے حوالے سے تفصیلی بریفنگ دیتے ہوئے بتایا کہ ضلع کی تمام یونین کونسلوں میں اہم داخلی و خارجی راستوں، بازاروں، عوامی مقامات اور حساس علاقوں کی نشاندہی کے بعد جدید سیف سٹی کیمرے نصب کیے جائیں گے جس سے جرائم کی مؤثر نگرانی، بروقت کارروائی اور شہریوں کے جان و مال کے تحفظ میں مدد ملے گی۔ اسسٹنٹ کمشنر لیہ زوہیب کریم نے یونین کونسل سیکرٹریز کو ہدایت کی کہ وہ اپنے متعلقہ علاقوں میں اہم مقامات، داخلی و خارجی راستوں، بازاروں اور حساس مقامات کا فوری اور جامع سروے مکمل کرکے رپورٹ متعلقہ حکام کو فراہم کریں تاکہ منصوبے پر تیز رفتاری سے عمل درآمد یقینی بنایا جا سکے۔ اسسٹنٹ کمشنر لیہ زوہیب کریم نے کہا کہ وزیراعلیٰ پنجاب مریم نواز شریف کے ’’محفوظ پنجاب‘‘ ویژن کے تحت سیف سٹی منصوبے کو یونین کونسل کی سطح تک توسیع دینے کے لیے عملی اقدامات کا جلد باقاعدہ آغاز کیا جا رہا ہے منصوبے کا مقصد جدید ٹیکنالوجی کے مؤثر استعمال کے ذریعے شہریوں کے جان و مال کا تحفظ، جرائم کی روک تھام اور امن و امان کی صورتحال کو مزید مستحکم بنانا ہے۔ انہوں نے کہا کہ منصوبے کی بروقت تکمیل کے لیے تمام متعلقہ ادارے باہمی تعاون اور ذمہ داری کے ساتھ فرائض انجام دیں تاکہ ضلع کے شہریوں کو محفوظ اور پُرامن ماحول کی فراہمی یقینی بنائی جا سکے۔
