لیہ( نمائندہ لیہ ٹی وی ) وزیر اعلیٰ پنجاب مریم نواز شریف کے وژن کے مطابق پنجاب ڈویلپمنٹ پروگرام پر تیزی سے کام جاری ہے۔ اس سلسلہ میں ڈپٹی کمشنر آصف علی ڈوگر کی ہدایت پر ایڈیشنل ڈپٹی کمشنر جنرل شبیر احمد ڈوگر نے پی ڈی پی سائٹ کا دورہ کیا اور وہاں جاری ترقیاتی کاموں کا تفصیلی جائزہ لیا۔ دورے کے دوران انہوں نے منصوبے کی مجموعی پیش رفت، تعمیراتی معیار، فیلڈ انتظامات اور کام کی رفتار کا معائنہ کیا۔ انہوں نے متعلقہ افسران کو ہدایت کی کہ تمام ترقیاتی سرگرمیاں مقررہ معیار اور ٹائم لائن کے مطابق مکمل کی جائیں تاکہ منصوبہ بروقت عوام کے لیے کارآمد ثابت ہو۔ ایڈیشنل ڈپٹی کمشنر جنرل شبیر احمد ڈوگر نے اس موقع پر کہا کہ حکومت پنجاب کے ترقیاتی منصوبوں میں شفافیت، معیار اور بروقت تکمیل کو یقینی بنایا جا رہا ہے۔ انہوں نے متعلقہ اداروں پر زور دیا کہ تعمیراتی کاموں کی مسلسل نگرانی کی جائے اور کسی بھی قسم کی کوتاہی یا غفلت برداشت نہیں کی جائے گی۔ انہوں نے کہا کہ پی ڈی پی کے پہلے فیز میں واٹر سٹوریج ٹینک کی تعمیر تیزی سے جاری ہے جس سے بارش کے پانی کے سٹوریج کا مسئلہ حل ہوگا اور شہر میں برساتی پانی جمع نہیں ہوگا۔ انہوں نے کہا کہ اس ساتھ ڈسپوزل ورکس اور شہر کے سیوریج کا کام شروع کیا جائے گا جس سے سیوریج کا دیرینہ مسئلہ بھی حل ہو جائے گا۔
